మృతికి జైపాల్ రెడ్డి కారణం: ఓయులో ర్యాలీ, ఉద్రిక్తం

By Srinivas

Published: Friday, July 22, 2011, 14:09 [IST]

హైదరాబాద్: రంగారెడ్డి జిల్లా మొయినాబాద్ మండలం పెద్దమంగళారానికి చెందిన యాదిరెడ్డి మృతికి ఆ నియోజకవర్గం కేంద్ర మంత్రి జైపాల్ రెడ్డి కారణమంటూ ఉస్మానియా విశ్వవిద్యాలయ విద్యార్థులు ఆరోపించారు. ఢిల్లీలోని పార్లమెంటు భవన్ సమీపంలో ఆత్మహత్య చేసుకున్న యాదిరెడ్డి మృతికి నైతిక బాధ్యత జైపాల్ రెడ్డిదే అని ఆరోపిస్తూ విద్యార్థులు జైపాల్ రెడ్డి దిష్టిబొమ్మను ఊరేగింపుగా తార్నాక వైపు తీసుకు వెళ్లే ప్రయత్నం చేశారు. జైపాల్ రెడ్డి రాజీనామా చేయాలని డిమాండ్ చేశారు.

అన్ని పార్టీలకు చెందిన తెలంగాణ ప్రజాప్రతినిధులు అందరూ రాజీనామా చేసినప్పటికీ జైపాల్ రెడ్డి ఎందుకు చేయడం లేదని ప్రశ్నించారు. తెలంగాణకు ద్రోహం చేస్తున్నారని ఆరోపించారు. అయితే తార్నాక వెళుతున్న విద్యార్థులను విశ్వవిద్యాలయ పోలీసులు అడ్డుకున్నారు. తార్నాక వెళ్లేందుకు ససేమీరా అన్నారు. దీంతో విద్యార్థులకు, పోలీసులకు మధ్య వాగ్వాదం జరిగింది. విద్యార్థులు యునివర్శిటీ పోలీసు స్టేషన్ ముందు బైఠాయించారు.

Published On July 22, 2011