చిరంజీవి విలీనం ఆశలపై నీళ్లు చల్లిన కాంగ్రెసు

By Srinivas

Published: Wednesday, July 27, 2011, 16:20 [IST]

హైదరాబాద్: ప్రజారాజ్యం పార్టీ అధ్యక్షుడు చిరంజీవి ఆశలపై కాంగ్రెసు అధిష్టానం మరోసారి నీళ్లు జల్లినట్లుగా కనిపిస్తోంది. ప్రజారాజ్యం పార్టీని కాంగ్రెసులో విలీనం చేస్తామని ఢిల్లీ వేదికగా ప్రకటించిన చిరంజీవి అదే స్థాయిలో విలీనం సభను భారీగా జరపాలని భావిస్తూ వచ్చారు. తిరుపతి గానీ, గుంటూరులోగానీ విలీన సభను భారీగా నిర్వహించాలని చిరంజీవితో పాటు ప్రజారాజ్యం పార్టీ భావిస్తూ వస్తున్నది. చిరంజీవిని పార్టీలోకి ఆహ్వానించిన సమయంలో కాంగ్రెసు పార్టీ అధిష్టానం ఆయనకు చాలా ప్రాధాన్యత ఇచ్చింది. కాంగ్రెసు నేతలకు దొరకని సోనియా దర్శనం చిరంజీవికి అనుకున్నదే తడవుగా దొరికింది. పార్టీ విలీన సభను భారీగా ఏర్పాటు చేస్తే ఏఐసిసి అధ్యక్షురాలు సోనియా గాంధీ లేదా రాహుల్ గాంధీని తీసుకు రావాలని చిరంజీవి భావించారు.

వైయస్ జగన్మోహన్ రెడ్డి పార్టీ వీడి కొత్త కుంపటి పెట్టుకున్న తర్వాత ఆయన పార్టీ ఆవిర్భావ సభ కన్నా ఘనంగా విలీన సభను నిర్వహించాలని కాంగ్రెసు వర్గాలు కూడా భావించాయి. కానీ ఇప్పుడు కాంగ్రెసు పార్టీ అధిష్టానం మాత్రం విలీనాన్ని సాదాసీదాగా నిర్వహించాలని చావు కబురు చల్లగా చిరంజీవి దృష్టికి తెచ్చినట్లు కనిపిస్తోంది. చిరంజీవికి ఢిల్లీలో కాంగ్రెసు పార్టీ సభ్యత్వాన్ని సాదాసీదాగా ఇవ్వాలని అధిష్టానం భావిస్తోంది. అలాగే శాసనసభ్యులు హైదరాబాదులోని గాంధీ భావనంలో, జిల్లా స్థాయి నేతలు డిసిసి కార్యాలయాల్లో కాంగ్రెసు పార్టీ సభ్యత్వాన్ని తీసుకోనున్నారు.

Published On July 27, 2011