సత్యం రామలింగరాజుకు బెయిలు ఇక ఈజీ?

By Srinivas

Published: Sunday, July 31, 2011, 16:31 [IST]

హైదరాబాద్: సత్యం కంప్యూటర్స్ రామలింగరాజుకు బెయిలు వచ్చే అవకాశాలు కనిపిస్తున్నాయి. సత్యం కంప్యూటర్సులోని పెట్టుబడులను తమ సొంత కంపెనీలోకి తరలించాడనే అభియోగాలు ఎదుర్కొంటున్న రామలింగ రాజును దాదాపు రెండేళ్ల క్రితం అరెస్టు అయిన విషయం తెలిసిందే. ఆయన అరెస్టు అయిన తర్వాత పలుమార్లు కోర్టుకు వెళ్లి బెయిలు కోసం ప్రయత్నాలు చేశారు. అయితే కోర్టు బెయిలుకు అంగీకరించలేదు. చివరకు ఆయన సుప్రీం కోర్టుకు వెళ్లి బెయిలు ఇవ్వాల్సిందిగా కోరారు. అందుకు సుప్రీం కోర్టు కూడా నిరాకరించింది.

అయితే జూలై 31 2011వ తేదిలోగా సిబిఐ తన విచారణను పూర్తి చేయాలని ఆదేశించింది. ఆ లోపు సిబిఐ విచారణ పూర్తి చేయలేక పోతే బెయిలుకు దరఖాస్తు చేసుకోవచ్చునని కోర్టు తెలిపింది. దీంతో రామలింగరాజుతో పాటు ఆయన టీంకు కూడా బెయిలు వచ్చే అవకాశాలు సులభతరం అయ్యాయని తెలుస్తోంది. సిబిఐ విచారణ తేది ఆదివారంతో ముగియనుంది. ఈ కారణంగా ఆయన బెయిలుకు దరఖాస్తు చేసుకునే అవకాశం ఉంది. అయితే సిబిఐ కూడా బెయిలుపై కౌంటర్ దాఖలు చేసే అవకాశం ఉందని సమాచారం. ఇప్పటి వరకు 224 మందిని సిబిఐ విచారించింది.

Published On July 31, 2011