చిదంబరం వెనుక ముఖ్యమంత్రి: నాగం జనార్దన్ రెడ్డి

By Srinivas

Published: Tuesday, August 2, 2011, 15:48 [IST]

హైదరాబాద్: కేంద్ర మంత్రి చిదంబరం వ్యాఖ్యల వెనుక ముఖ్యమంత్రి కిరణ్ కుమార్ రెడ్డి హస్తం ఉందని తెలుగుదేశం పార్టీ బహిష్కృత శాసనసభ్యుడు నాగం జనార్దన్ రెడ్డి మంగళవారం అనుమానం వ్యక్తం చేశారు. 14ఎఫ్ రద్దుకు మరోసారి అసెంబ్లీలో తీర్మానం చేయాలని చెప్పడం సరికాదన్నారు. మరోసారి తీర్మానం అంటే అది రాజ్యాంగ స్ఫూర్తికి విరుద్దమని అన్నారు. ఒకవేళ ఈ తీర్మానం మళ్లీ చేయాలని కేంద్రం భావిస్తే గతంలో జరిగిన అన్ని తీర్మానాలను తిరిగి అసెంబ్లీలో తీర్మానం చేస్తారా అని ప్రశ్నించారు. మళ్లీ తీర్మానం అనడం అనాలోచిత నిర్ణయం అన్నారు.

ఢిల్లీలో పిచ్చి తుగ్లక్ పాలన కొనసాగుతున్నట్లుగా కనిపిస్తోందన్నారు. స్పీకర్ నాదెండ్ల మనోహర్ వచ్చాక తమ రాజీనామాలు ఆమోదింప జేసుకొని కాంగ్రెసు, తెలుగుదేశం పార్టీ ప్రజా ప్రతినిధుల నియోజకవర్గాల్లో పర్యటిస్తామని చెప్పారు. తెలంగాణ కోసం రాజీనామాలు చేయని ప్రజాప్రతినిధుల ఇళ్ల ముందు ఆందోళన చేస్తామని హెచ్చరించారు. అందరూ ప్రజల మనోభావాలకు అనుగుణంగా నిర్ణయం తీసుకోవాలన్నారు. తెలంగాణ టిడిపి నేతలను ప్రజలు ఎవరూ నమ్మడం లేదన్నారు. కాంగ్రెసు నేతలు రాజీనామా చేసిన తర్వాత రాజీనామాలు చేస్తామని టిడిపి నేతలు చెప్పడం హాస్యాస్పదం అన్నారు.

Published On August 2, 2011