సోనియా గాంధీ మెరుగ్గా ఉన్నారు: రాహుల్

న్యూఢిల్లీ: అమెరికాలోని అస్పత్రిలో చికిత్స పొందిన తన తల్లి, పార్టీ అధ్యక్షురాలు సోనియా గాంధీ ఇప్పుడు మెరుగ్గా ఉన్నారని కాంగ్రెసు నాయకుడు, పార్లమెంటు సభ్యుడు రాహుల్ గాంధీ అన్నారు. తల్లితో పాటు అమెరికా వెళ్లిన రాహుల్ ఆదివారం ఇక్కడికి తిరిగి వచ్చారు. సోనియా చాలా మెరుగ్గా ఉన్నారని ఆయన సోమవారం మీడియా ప్రతినిధులతో చెప్పారు.

సోనియా గాంధీ ఈ నెలారంభంలో శస్త్ర చికిత్స చేయించుకోవడానికి అమెరికా వెళ్లారు. పార్టీ కేంద్ర కార్యాలయంలో జరిగిన పతాకావిష్కరణ కార్యక్రమానికి రాహుల్ గాంధీ సోమవారం హాజరయ్యారు. సీనియర్ కాంగ్రెసు నాయకుడు మోతీలాల్ వోహ్రాను జాతీయ పతాకను ఆవిష్కరించాల్సిందిగా ఆయన కోరారు. సోనియా గాంధీ గైర్హాజరీలో తాను పతాకావిష్కరణ చేయనున్నట్లు జరిగిన ప్రచారానికి ఆయన ఆ విధంగా తెర వేశారు

పార్టీ కార్యాలయంలోని జాతీయ పతాకావిష్కరణ కార్యక్రమానికి ప్రధాని మన్మోహన్ సింగ్‌తో పాటు పలువురు సీనియర్ నాయకులు హాజరయ్యారు. ఈ కార్యక్రమం తర్వాత రాహుల్ గాంధీ ప్రధానితో సమావేశమయ్యారు. వారి మధ్య దాదాపు గంట సేపు సాగింది. ఈ సమావేశంలో కేంద్ర మంత్రులు ప్రణబ్ ముఖర్జీ, అంబికా సోనీ, పార్టీ అధికార ప్రతినిధి జనార్దన్ ద్వివేది కూడా పాల్గొన్నారు. అన్నా హజారే దీక్ష నేపథ్యంలో పరిణామాలను రాహుల్ గాంధీ అడిగి తెలుసుకున్నట్లు సమాచారం.

English summary

Congress president Sonia Gandhi, who underwent surgery in the US recently for an unspecified ailment, is "much better".