చంద్రబాబు ట్రాప్‌లో కాంగ్రెసు, కిరణ్ కుమార్ చేయూత?

By Pratap

Published: Friday, August 26, 2011, 9:38 [IST]

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడికి ముఖ్యమంత్రి కిరణ్ కుమార్ రెడ్డి సహకరిస్తున్నారంటూ వైయస్సార్ కాంగ్రెసు పార్టీ అధ్యక్షుడు వైయస్ జగన్‌కు చెందిన సాక్షి డైలీ ఓ వార్తాకథనాన్ని ప్రచురించింది. కిరణ్ సైకిలెక్కారా అనే శీర్షిక కింద ఈ వార్తాకథనాన్ని ప్రచురించింది. కాంగ్రెసు చంద్రబాబు ట్రాప్‌లో పడ్డారంటూ మాజీ మంత్రి జీవన్ రెడ్డి ప్రకటనతో కాంగ్రెసులో కలకలం ప్రారంభమైందని వ్యాఖ్యానించింది. చంద్రబాబుకు ముఖ్యమంత్రి సహకరిస్తున్నారనే అనుమానాలను వ్యక్తం చేసింది. పదవిని కాపాడుకోవడానికే కిరణ్ కుమార్ రెడ్డి అందుకు పూనుకున్నారంటూ విమర్శించింది. సిబిఐ కేసులో ప్రభుత్వం కౌంటర్ దాఖలు చేయకపోవడానికి కూడా కిరణ్ కుమార్ రెడ్డే కారణమని ఎత్తిపొడిచింది.

ఇటీవల స్థానిక సంస్థల నియోజకవర్గ ఎమ్మెల్సీ ఎన్నికల్లోనే కాంగ్రెసు, తెలుగుదేశఁ పార్టీ మధ్య మ్యాచ్ ఫిక్సింగ్ జరిగిందనే ఆరోపణలు వచ్చాయని, అప్పటి నుంచి కిరణ్ కుమార్ రెడ్డి, చంద్రబాబు మధ్య సన్నిహిత సంబంధాలు కొనసాగుతున్నాయని సాక్షి పత్రిక రాసింది. ఈ స్థితిలో కిరణ్ కుమార్ రెడ్డి వ్యూహంలో ఇరుక్కుపోయి చంద్రబాబు ట్రాప్‌లో పడిపోయామా అనే అనుమానాలు కాంగ్రెసు నాయకుల్లో బయలుదేరినట్లు రాసింది. సిబిఐ దర్యాప్తు నేపథ్యంలో రాజకీయంగా కలకలం సృష్టించి, కాంగ్రెసులో మరింత అస్థిరతను సృష్టించి, మరింత మంది శాసనసభ్యులను తన వైపు లాక్కునే జగన్ వ్యూహంలో భాగంగానే ఈ వార్తాకథనం వచ్చి ఉంటుందని కాంగ్రెసులోని ఓ వర్గం అభిప్రాయపడుతోంది.

Published On August 26, 2011