గాలి అక్రమ మైనింగ్‌ను సమర్థించను: సదానంద

By Pratap

Published: Monday, September 5, 2011, 10:51 [IST]

హుబ్లీ/ న్యూఢిల్లీ‌: వైయస్సార్ కాంగ్రెసు అధ్యక్షుడు వైయస్ జగన్‌కు సన్నిహితుడు కావడం వల్లనే తమ పార్టీ నాయకుడు గాలి జనార్దన్ రెడ్డిని అరెస్టు చేసినట్లు బిజెపి ఆరోపిస్తోంది. ఆంధ్రప్రదేశ్ రాజకీయాల నేపథ్యంలో కాంగ్రెసు పార్టీ సిబిఐ వాడుకుంటోందని, దానివల్లనే గాలి జనార్దన్ రెడ్డి అరెస్టు జరిగిందని వ్యాఖ్యానిస్తోంది. గాలి జనార్దన్ రెడ్డి అరెస్టును ఓ వైపు సమర్థిస్తూనే మరో వైపు కాంగ్రెసుపై బిజెపి విమర్శలు చేస్తోంది. ఒక రకంగా ఆచితూచి మాట్లాడుతోంది. సిబిఐని రాజకీయాస్త్రంగా వాడుకుంటోందని మాత్రమే బిజెపి వ్యాఖ్యానిస్తోంది గానీ గాలి జనార్దన్ రెడ్డి అరెస్టు సరి కాదని అనడం లేదు.

గాలి సోదరుల అక్రమ మైనింగ్‌ను సమర్థించబోనని కర్ణాటక ముఖ్యమంత్రి సదానంద గౌడ స్పష్టం చేశారు. గాలి జనార్దన్ రెడ్డి ముఖ్య అనుచరుడు శ్రీరాములు రాజీనామా వల్ల గానీ గాలి జనార్దన్ రెడ్డి ఇళ్లలో సిబిఐ సోదాల వల్ల గానీ తమ ప్రభుత్వానికి ఏ విధమైన నష్టం లేదని ఆయన సోమవారం మీడియా ప్రతినిధులతో అన్నారు. కాగా, కుట్రలో భాగంగానే సిబిఐ సోదాలు జరిగాయని శ్రీరాములు ఆరోపించారు.

గాలి జనార్దన్ రెడ్డి మైనింగ్ వ్యాపారంతో తమకు ఏ విధమైన సంబంధం లేదని, అది గాలి జనార్దన్ రెడ్డి ప్రైవేట్ వ్యాపారమని బిజెపి వ్యాఖ్యానించింది. మైనింగ్ కుంభకోణం కేసు నుంచి గాలి జనార్దన్ రెడ్డి బయటపడతారనే ఆశాభావాన్ని బిజెపి వ్యక్తం చేసింది. రాజకీయంగా తమతో ఉన్నంత కాలం గాలి సోదరలుకు తమ మద్దతు ఉంటుందని కర్ణాటక ప్రభుత్వ ప్రత్యేక ప్రతినిధి ధనంజయ్ కుమార్ ఢిల్లీలో చెప్పారు.

గాలి జనార్దన్ రెడ్డి అరెస్టును దర్యాప్తులో భాగంగా ఆయన వ్యాఖ్యానించారు. సిబిఐ ఆంధ్రప్రదేశ్ హైకోర్టు ఆదేశాల మేరకు గాలి జనార్దన్ రెడ్డిని అరెస్టు చేసిందని ఆయన అన్నారు. దర్యాప్తులో అవసరమని భావిస్తే సిబిఐ ఎవరినైనా అదుపులోకి తీసుకోవచ్చునని, సిబిఐకి ఆ హక్కు ఉందని అన్నారు.

Published On September 5, 2011