ప్రాణాపాయ స్థితిలోనే అజర్ కుమారుడు ఆయాజ్

By Pratap

Published: Monday, May 28, 2012, 19:06 [IST]

హైదరాబాద్‌: కాంగ్రెసు పార్లమెంటు సభ్యుడు అజరుద్దీన్ కుమారుడు అయాజుద్దీన్ ప్రాణాపాయ స్థితిలోనే ఉన్నాడు. రోడ్డు ప్రమాదంలో తీవ్రంగా గాయపడిన అజహరుద్దీన్‌ కుమారుడు అయాజుద్దీన్‌ ఆరోగ్య పరిస్థితిపై అపోలో ఆస్పత్రి వైద్యుల సోమవారం సాయంత్రం తాజా మెడికల్‌ బులెటిన్‌ విడుదలైంది. అయాజుద్దీన్‌ పరిస్థితి మరింత విషమంగా ఉందని అపోలో ఆస్పత్రి వైద్యులు తెలిపారు. అయాజుద్దీన్‌కు మల్టీ స్పెషాలిటీ వైద్య బృందంతో వైద్య పరీక్షలు అందిస్తున్నామని, ఇంతవరకు ఒక శస్త్రచికిత్స చేశామని వైద్యులు తెలియజేశారు. అయాజుద్దీన్‌ ప్రాణాలు కాపాడేందుకు అవసరమైన వైద్య చికిత్సలన్నీ చేస్తున్నామని అపోలో వైద్యులు తెలిపారు.

ఎడమ ఊపిరితిత్తులకు మాత్రమే శస్త్రచికిత్స చేశామని అపోలో వైద్యుడు హరిప్రసాద్ చెప్పారు. దాదాపు 80 యూనిట్ల రక్తం ఎక్కించామని ఆయన చెప్పారు. వెన్నెముకకు మూడు గాయాలైనట్లు ఆయన తెలిపారు. మెదడులో రక్తం గడ్డ కట్టిందని, మెదడు పరిస్థితిపై ఇప్పుడే ఏమీ చెప్పలేమని ఆయన అన్నారు. దాదాపు మరణించే స్థితిలో ఆయాజ్‌ను ఆస్పత్రికి తెచ్చారని ఆయన అన్నారు. ప్రాణాపాయ స్థితి నుంచి అయాజ్ బయటపడతాడా, లేదా అనేది కూడా ఇప్పుడే చెప్పలేమని ఆయన అన్నారు. మూత్రపిండాలు, ఊపిరితిత్తులు దెబ్బ తిన్నాయని ఆయన అన్నారు.

Published On May 28, 2012