తెలంగాణపై నెలలో ఆజాద్ ప్రకటన: వివేక్

న్యూఢిల్లీ: తెలంగాణపై తమ పార్టీ ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ నెలలోపల ప్రకటన చేస్తారని ప్రధాని డాక్టర్ మన్మోహన్ సింగ్ చెప్పినట్లు కాంగ్రెసు తెలంగాణ పార్లమెంటు సభ్యుడు జి. వివేక్ తెలిపారు. ప్రధానితో భేటీ అనంతరం ఆయన బుధవారం మీడియా ప్రతినిధులతో మాట్లాడారు. తెలంగాణకు అనుకూలంగా త్వరగా నిర్ణయం చేయాలని తాము కోరామని, ఆజాద్ ఆ విషయం చూస్తారని ప్రధాని చెప్పారని ఆయన వివరించారు. తెలంగాణ రాష్ట్ర ఏర్పాటు ప్రక్రియను ప్రారంభిస్తున్నట్లు కేంద్ర హోం మంత్రి చిదంబరం చేసిన ప్రకటనను అమలు చేయాలని తాము కోరినట్లు ఆయన తెలిపారు.

తెలంగాణలో సకల జనుల సమ్మె విజయవంతంగా సాగుతుందనే విషయాన్ని తాము ప్రధాని దృష్టికి తీసుకుని వెళ్లామని ఆయన చెప్పారు. తెలంగాణ రావడానికి అందరూ సహకరిస్తే సమస్యలు ఉండవని ఆయన అన్నారు. నిజామాబాద్ జిల్లా బాన్సువాడ ఉప ఎన్నికలో కాంగ్రెసు పోటీ చేస్తే ప్రజల్లోకి తప్పుడు సంకేతాలు వెళ్తాయని ఆయన అన్నారు. తెలంగాణ అంశంపైనే బాన్సువాడ ఉప ఎన్నిక జరుగుతుందని ఆయన చెప్పారు.

English summary

Congress Telangana MP G Vivek said that pm assured them ghulam Nabi Azad will make a statement on Telangana wiyhin a month.