చిరంజీవిని తెలంగాణలో తిరగనివ్వం: కోమటిరెడ్డి

By Pratap

Published: Saturday, September 17, 2011, 14:27 [IST]

నల్లగొండ: సమైక్య నినాదం చేస్తే తమ పార్టీ శాసనసభ్యుడు చిరంజీవిని తెలంగాణలో తిరగనివ్వబోమని తెలంగాణకు చెందిన రాష్ట్ర మంత్రి కోమటిరెడ్డి వెంకటరెడ్డి హెచ్చరించారు. ముఖ్యమంత్రి కిరణ్ కుమార్ రెడ్డి, పిసిసి అధ్యక్షుడు బొత్స సత్యనారాయణను కూడా తిరగనివ్వమని ఆయన అన్నారు. అక్టోబర్ 1వ తేదీలోగా పార్టీ అధిష్టానం తెలంగాణకు అనుకూలంగా ప్రకటన చేయకపోతే పార్టీకి, మంత్రి పదవికి రాజీనామా చేస్తానని ఆయన శనివారం చెప్పారు.

ఈ నెలాఖరులోగా అధిష్టానం నుంచి తెలంగాణపై ప్రకటన రాకపోతే హైదరాబాదుకు వచ్చే రహదారులను దిగ్బంధం చేస్తామని ఆయన హెచ్చరించారు. తెలంగాణ ఉద్యమాన్ని ఉధృతం చేస్తామని ఆయన అన్నారు. సకల జనుల సమ్మెను అడ్డుకోవడానికి చూస్తే ప్రభుత్వ మనుగడ కష్టమని కాంగ్రెసు తెలంగాణ పార్లమెంటు సభ్యుడు గుత్తా సుఖేందర్ రెడ్డి అన్నారు. ఈ నెలాఖరులోగా తెలంగాణపై ప్రకటన చేయకపోతే ప్రభుత్వాన్ని కూల్చడానికైనా సిద్ధపడుతామని ఆయన అన్నారు.

Published On September 17, 2011