సింఘ్వీపై ధ్వజమెత్తిన తెలంగాణ నాయకులు

By Pratap

Published: Wednesday, September 21, 2011, 19:02 [IST]

హైదరాబాద్: సకల జనుల సమ్మె వల్ల తెలంగాణ పాలన స్తంభించలేదని ఎఐసిసి అధికార ప్రతినిధి అభిషేక్ మను సింఘ్వీ చేసిన వ్యాఖ్యపై తెలంగాణ నాయకులు ధ్వజమెత్తారు. సకల జనుల సమ్మెను ఎక్కువ చేసి చూపుతున్నారని, సమ్మె వల్ల తెలంగాణ అంతా స్తంభించిందనడం సరి కాదని ఆయన అన్నారు. తెలంగాణ సమస్య పరిష్కారానికి పార్టీపరంగా తాము చర్చలు జరుపుతున్నామని, ఓపిక పట్టాలని ఆయన అన్నారు. తెలంగాణ సమస్యపై ప్రతి ఒక్కరూ విజ్ఞత ప్రదర్శించాలని ఆయన సూచించారు. ఒత్తిడి ద్వారా సమస్య పరిష్కారం కాదని ఆయన అన్నారు. దీనిపై తెలంగాణ నాయకులు తీవ్రంగా మండిపడ్డారు.

పాలన స్తంభించలేదనే సింఘ్వీ మాటను తెలంగాణ రాష్ట్ర సమితి (తెరాస) శాసనసభ్యుడు కెటి రామారావు తప్పు పట్టారు. పాలన స్తంభించకపోతే ప్రధాని మన్మోహన్ సింగ్‌కు ఫోన్ చేసి బొగ్గు, విద్యుత్ కావాలని ఎందుకు అడుగుతారని ఆయన ప్రశ్నించారు. వాస్తవాలు తెలుసుకుని మాట్లాడాలని తెలంగాణ రాజకీయ జెఎసి చైర్మన్ కోదండరామ్ సింఘ్వీకి సూచించారు. సింఘ్వీ ప్రకటనను ఆయన తప్పు పట్టారు.

Published On September 21, 2011