కోఠీలో ఉద్రిక్తత, శ్రీనివాస్‌తో మాట్లాడిన ముఖ్యమంత్రి

By Pratap

Published: Thursday, September 22, 2011, 16:07 [IST]

హైదరాబాద్: శ్రీనివాస్ అనే యువకుడు హోర్డింగ్‌పైకి ఎక్కి దూకుతానని బెదిరిస్తుండడంతో హైదరాబాదులోని కోఠీ ప్రాంతంలో తీవ్ర ఉద్రిక్తత నెలకొంది. తెలంగాణకు చెందిన కాంగ్రెసు, తెలుగుదేశం పార్టీ శాసనసభ్యులు వచ్చి రాజీనామాలు చేస్తామని హామీ ఇస్తేనే తాను కిందికి దిగుతానని అతను పట్టుబడుతున్నాడు. శ్రీనివాస్‌తో ముఖ్యమంత్రి కిరణ్ కమార్ రెడ్డి కూడా ఫోన్లో మాట్లాడారు. హోర్డింగుపైనుంచి దిగి రావాలని ఆయన శ్రీనివాస్‌కు సూచించారు. పలువురు తెలంగాణ నాయకులతో పాటు టీవీ చానెళ్లు విజ్ఞప్తి చేసినా అతను వినడం లేదు. అతని తల్లిదండ్రులు బోరున విలపిస్తున్నారు. తమకు శ్రీనివాస్ ఒక్కడే కొడుకని చెప్పుకుంటూ దిగిరావాలని అతన్ని కోరుతున్నారు. అయినా వినడం లేదు.

బిజెపి నాయకుడు బండారు దత్తాత్రేయ, తెలంగాణ రాష్ట్ర సమితి (తెరాస) శాసనసభ్యుడు హరీష్ రావు, తెలంగాణ జాగృతి అధ్యక్షురాలు కల్వకుంట్ల కవిత కిందికి దిగిరావాలని శ్రీనివాస్‌ను కోరారు. కోఠీలో తెలంగాణవాదులు విధ్వంసానికి దిగినట్లు వార్తలు వస్తున్నాయి. విధ్వంసానికి సంబంధించిన దృశ్యాలు తమ వద్ద ఉన్నాయని, పరిస్థితి విషమించకూడదనే ఉద్దేశంతో తాము వాటిని ప్రసారం చేయడం లేదని జి 24 గంటలు న్యూస్ చానెల్ చెబుకుంటోంది. కోఠీ పరిసర ప్రాంతాల్లో తెలంగాణవాదులు దుకాణాలను మూయిస్తున్నారు. తన తల్లిదండ్రుల బాధ తనకు తెలుసునని, అయితే తనకు తెలంగాణ రాష్ట్రం ఏర్పాటు ముఖ్యమని శ్రీనివాస్ అంటున్నాడు.

Published On September 22, 2011