జగన్ ఆస్తుల విచారణ అందుకే మందగించింది: డిఎల్

By Srinivas

Published: Thursday, September 22, 2011, 9:30 [IST]

శ్రీకాకుళం: వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి ఆస్తులపై జరుగుతున్న సిబిఐ విచారణపై తెలుగుదేశం పార్టీ అభిప్రాయంతో మంత్రి డిఎల్ రవీంద్రా రెడ్డి విభేదించారు. జగన్ ఆస్తులపై సిబిఐ విచారణ మందగించలేదని ఆయన శ్రీకాకుళం జిల్లాలో అన్నారు. విచారణలో వేగం ఏమాత్రం తగ్గలేదన్నారు. కర్నాటక మాజీ మంత్రి, భారతీయ జనతా పార్టీ శాసనసభ్యుడు గాలి జనార్ధన్ రెడ్డి ఓబుళాపురం మైనింగ్ అక్రమాలపై విచారణ జరుగుతుందని అందుకే జగన్ ఆస్తులపై విచారణ కాస్త నెమ్మదిగా ఉండొచ్చు. అంతే తప్ప ఇతర కారణాలు లేవని ఆయన అభిప్రాయపడ్డారు.

జగన్ ఢిల్లీ వెళ్లినప్పుడు ఏఐసిసి అధ్యక్షురాలు సోనియా గాంధీని గాని మరే ఇతర ముఖ్య నేతలను కానీ కలవలేదన్నారు. సిబిఐ విచారణతో కాంగ్రెసు పార్టీకి ఎలాంటి సంబంధం లేదన్నారు. చేనేత, జౌళీ శాఖ మంత్రి శంకర్ రావు ఫిర్యాదు, హైకోర్టు ఆదేశాల మేరకే సిబిఐ తన విచారణ కొనసాగిస్తోందని కాంగ్రెసు పార్టీకి దాంతో సంబంధం లేదన్నారు. ఎమ్మార్ ప్రాపర్టీస్, గాలి మైనింగ్, జగన్ ఆస్తులపై సిబిఐ పరిశీలిస్తోందన్నారు.

Published On September 22, 2011