తెలంగాణ తీసుకురండి లేదా మాతో రండి: ఎర్రబెల్లి

By Srinivas

Published: Thursday, September 22, 2011, 15:50 [IST]

హైదరాబాద్: తెలంగాణ కాంగ్రెసు ప్రజా ప్రతినిధులు ఈ నెల 25న ఢిల్లీకి వెళ్లి తెలంగాణ ప్రత్యేక రాష్ట్ర ప్రకటనతో తిరిగి రావాలని లేదంటే 28వ తారీఖున రాజీనామా చేసేందుకు తమతో కలిసి రావాలని తెలంగాణ తెలుగుదేశం ఫోరం డిమాండ్ చేసింది. ఢిల్లీ వెళ్లే కాంగ్రెసు నేతలు తెలంగాణ ప్రకటనతో తిరిగి వస్తే విమానాశ్రయంలో ఊరేగింపుగా ఘన స్వాగతం పలుకుతామన్నారు. లేదంటే అందరం కలిసి ఈ నెల 28న స్పీకర్ నాదెండ్ల మనోహర్‌కు రాజీనామాలు సమర్పించుదాం అందుకు సిద్ధంగా ఉండాలని డిమాండ్ చేశారు. సకల జనుల సమ్మె ఇంత ఉధృతంగా ఉన్న నేపథ్యంలో తెలంగాణ సాధించడానికి ఇప్పుడే మంచి సమయమన్నారు.

తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుకు తెలంగాణపై చిత్తశుద్ధి లేదన్నారు. ఆయన తమ పార్టీ సీట్లు పెంచుకోవాలనే దృష్టితోనే ఆయన ఉన్నారని ఆరోపించారు. సకల జనుల సమ్మెకు మద్దతుగా శుక్రవారం తాము తలపెట్టిన ఒక్కరోజు ఆందోళనలో గందరగోళం సృష్టించడానికి టిఆర్ఎస్ ప్రయత్నాలు చేస్తోందన్నారు. తెలంగాణ కోసం అధికార పార్టీ ముందుకు రాకుండా ఎన్ని ఉద్యమాలు చేసినా ఫలితం ఉండదన్నారు. సీనియర్ ఎమ్మెల్యేలు ఎర్రబెల్లి దయాకర్ రావు, మోత్కుపల్లి నరసింహులు తదితరులు ఈ సమావేశంలో మాట్లాడారు.

Published On September 22, 2011