తెలంగాణ వేరు కాశ్మీర్ వేరు: గులాం నబీ ఆజాద్

By Srinivas

Published: Sunday, October 2, 2011, 9:59 [IST]

హైదరాబాద్: తెలంగాణ సమస్య వేరు కాశ్మీర్ సమస్య వేరు అని కేంద్రమంత్రి, రాష్ట్ర వ్యవహారాల ఇంచార్జ్ గులాం నబీ ఆజాద్ ఆదివారం హైదరాబాదులో అన్నారు. పార్లమెంటు సభ్యుడు లగడపాటి రాజగోపాల్ విజయవాడలో నిర్వహిస్తున్న వందే గాంధేయవాదం ప్రారంభోత్సవం సందర్భంగా ఆయన ఆదివారం ఉదయం హైదరాబాద్ వచ్చారు. ఈ సందర్భంగా ఆయన మాట్లాడారు. తెలంగాణ సమస్యను కాశ్మీర్ సమస్యతో పోల్చలేమని చెప్పారు. నిర్ధిష్ట సమయం చెప్పలేక పోయినప్పటికీ తెలంగాణ త్వరలో పరిష్కారమవుతుందని చెప్పారు.

సామాన్య ప్రజలు, రైతులు తీవ్ర ఇబ్బందులు ఎదుర్కొంటున్న దృష్ట్యా ఉద్యోగులు సమ్మె విరమించాలని ఆయన విజ్ఞప్తి చేశారు. పండగలను దృష్టిలో పెట్టుకొని ప్రజలకు సహకరించాలని కోరారు. సమస్యను సంప్రదింపుల ద్వారా పరిష్కరించాల్సి ఉంటుందన్నారు. అందుకోసం ప్రయత్నాలు చేస్తున్నామన్నారు. సమస్య పరిష్కారానికి అందరూ సహకరించాలని కోరారు. తెలంగాణపై రాష్ట్ర స్థాయిలో చర్చలు పూర్తయ్యాయని జాతీయస్థాయిలో చర్చించాల్సి ఉందన్నారు. తెలంగాణపై అధిష్టానం సీరియస్‌గా పని చేస్తోందన్నారు.

Published On October 2, 2011