బియ్యం పథకం ఫైలు పైనే సంతకం చేశా: సిఎం

By Srinivas

Published: Sunday, October 2, 2011, 14:39 [IST]

ప్రకాశం: తాను ఉదయమే ఒక్క రూపాయికి కిలో బియ్యం పథకం ఫైలుపై సంతకం చేశానని ముఖ్యమంత్రి కిరణ్ కుమార్ రెడ్డి ప్రకాశం జిల్లాలో అన్నారు. జిల్లాలోని జంగాలపల్లి మండలం ఎర్రగొండపాలెంలో కేంద్ర మంత్రి, రాష్ట్ర వ్యవహారాల ఇంచార్జ్ గులాం నబీ ఆజాద్‌తో కలిసి ఇందిర జల ప్రభను ప్రారంభించారు. ఈ సందర్భంగా ముఖ్యమంత్రి మాట్లాడారు. నవంబరు 1 నుండే ఒక్క రూపాయి కిలో బియ్యం పథకం అమలులోకి వస్తుందన్నారు. అలాగే లక్ష వరకు రుణం తీసుకున్న రైతులకు సకాలంలో వాటిని చెల్లిస్తే వడ్డీ రద్దు చేస్తామని ప్రకటించారు.

దీని ద్వారా 91 లక్షల మంది రైతులకు ప్రయోజనం చేకూరుతుందన్నారు. రాష్ట్రంలోని పలు ప్రాంతాలలోని బీడు భూమిని సాగు భూమిగా మార్చుతామని హామీ ఇచ్చారు. పావలా వడ్డీ రుణాలు విడుదల చేసినట్లు చెప్పారు. సమ్మె వల్ల తెలంగాణలో అభివృద్ధి ఆగిపోయిందన్నారు. గులాం నబీ ఆజాద్ మాట్లాడుతూ జల ప్రభను ప్రారంభించడం సంతోషంగా ఉందన్నారు. ఎన్నికల ముసాయిదాలో పేర్కొన్న వాటిని దశల వారిగా నెరవేర్చుతామన్నారు.

Published On October 2, 2011