తెలంగాణపై కోర్ కమిటీ చర్చలు, నిర్ణయం ఉత్తదే

By Pratap

Published: Wednesday, October 12, 2011, 8:15 [IST]

న్యూఢిల్లీ: తెలంగాణపై ఏ నిర్ణయం తీసుకోకుండానే కాంగ్రెసు కోర్ కమిటీ సమావేశం మంగళవారం సాయంత్రం ముగిసింది. ఓ నిర్ణయానికి రావడానికి కాంగ్రెసు కోర్ కమిటీ తీవ్రమైన సందిగ్ధంలో ఉన్నట్లు అర్థమవుతోంది. ప్రధాని మన్మోహన్‌సింగ్ నివాసంలో మంగళవారం కోర్ కమిటీ సమావేశమైంది. పార్టీ అధినేత్రి సోనియా గాంధీతోపాటు ప్రధాని మన్మోహన్, ఆర్థిక మంత్రి ప్రణబ్ ముఖర్జీ, సోనియా రాజకీయ సలహాదారు అహ్మద్ పటేల్, హోం మంత్రి చిదంబరం, రక్షణ మంత్రి ఏకే ఆంటోనీ, రాష్ట్ర వ్యవహారాల ఇన్‌చార్జి గులాంనబీ ఆజాద్ ఈ సమావేశంలో పాల్గొన్నారు. తెలంగాణపై అత్యంత కీలక సమాలోచనలు జరిపారు. సమస్య పూర్వాపరాలు, మినీ కోర్ కమిటీ ముందు కేంద్ర మంత్రులు, ముఖ్యమంత్రి, పీసీసీ అధ్యక్షుడు తదితరులు చెప్పిన అభిప్రాయాలను క్రోడీకరించి ప్రణబ్ ముఖర్జీ వివరించారు. తెలంగాణపై నిర్దిష్ట రాజకీయ నిర్ణయం తీసుకోవాల్సిన అవసరం ఉందని, వాయిదా వేయడం సరైంది కాదని ఆయన నివేదించినట్లు తెలిసింది. రాష్ట్రంలోని పరిస్థితులపై స్పష్టమైన నిర్ణయం ప్రకటించిన తర్వాత ఎలాంటి పరిస్థితులు ఎదురయ్యే అవకాశముందో హోం మంత్రి చిదంబరం సమావేశానికి వివరించినట్లు సమాచారం.

తాము తీసుకునే నిర్ణయం వల్ల తలెత్తే రాజకీయ పర్యవసానాలు, కాంగ్రెస్‌కు వచ్చే లాభనష్టాలను కోర్ కమిటీ సమీక్షించినట్లు తెలిసింది. అయితే, నిర్ణయం తీసుకునే ముందు మరోసారి చర్చలు జరపాలని, భాగస్వామ్య పార్టీల అభిప్రాయాలను సేకరించాలని, ఆ తర్వాత అఖిలపక్ష సమావేశం ఏర్పాటు చేయాలని కోర్ కమిటీ నిర్ణయించినట్లు తెలిసింది. రాష్ట్ర విభజనపై ఒక అభిప్రాయం చెప్పడానికి తొందర పడరాదని, తమ నిర్ణయం వల్ల తలెత్తే రాజకీయ సమస్యలపై పార్టీలోను, మిత్రపక్షాలతోనూ చర్చించి ఒక అభిప్రాయానికి రావాలని భావించినట్లు తెలిసింది.

మంగళవారం నాటి సమావేశం పూర్తిగా పార్జీ రాజకీయ ప్రయోజనాలపైనే కేంద్రీకృతమైందని, ఈ విషయంపై ఇంకా ఒక స్పష్టత ఏర్పడలేదని సీనియర్ నాయకుడొకరు చెప్పారు. అందువల్లే చర్చల వివరాలను రహస్యంగా ఉంచాలని నిర్ణయించినట్లు తెలిసింది. అవసరమైతే కోర్ కమిటీ మరోసారి సమావేశమయ్యే అవకాశాలు కూడా ఉన్నాయని కమిటీ సభ్యుడు ఒకరు తెలిపారు. తెలంగాణపై పార్టీ నిర్ణయాన్ని ప్రకటించే ముందు కాంగ్రెస్ వర్కింగ్ కమిటీ సమావేశాన్ని నిర్వహించడంపై కూడా ఈ సందర్భంగా చర్చకు వచ్చినట్లు తెలిసింది. రాష్ట్ర విభజనకు ముస్లింల అభ్యంతరాలపై సమావేశంలో చర్చ జరిగినట్లు తెలుస్తోంది.

Published On October 12, 2011