తెలంగాణవాదులకు డిజిపి దినేష్ రెడ్డి హెచ్చరిక

హైదరాబాద్: హింసాత్మక చర్యలకు పాల్పడితే కఠిన చర్యలు తీసుకుంటామని రాష్ట్ర డైరెక్టర్ జనరల్ ఆఫ్ పోలీసు దినేష్ రెడ్డి తెలంగాణవాదులకు గురువారం హెచ్చరికలు జారీ చేశారు. తెలంగాణ రాజకీయ ఐక్య కార్యాచరణ సమితి పిలుపు నేపథ్యంలో ఈ నెల 15, 16, 17 తేదీల్లో రైలు రోకో చేపడితే కఠిన చర్యలు తీసుకుంటామని హెచ్చరించారు. రైళ్లను అడ్డుకున్నా, షిప్ ప్లేట్లు తొలగించినా , పట్టాలపై కూర్చున్నా పడుకున్నా రైల్వే యాక్టు ప్రకారం కేసులు పెడతామన్నారు. కొన్ని యాక్టుల ప్రకారం జీవిత కాల శిక్ష పడవచ్చన్నారు. రోకో పేరుతో ప్రయాణీకులను ఇబ్బందులకు గురి చేయవద్దని సూచించారు. ఆందోళనకారులతో పాటు ప్రేరేపించే వారి పైనా కేసులు పెడతామన్నారు. ఆందోళనకారులు హద్దు మీరితే పోలీసులు జోక్యం చేసుకుంటారని అయితే ప్రజాస్వామ్య బద్దంగా ఎలాంటి ఆందోళనలు చేపట్టినా అభ్యంతరం లేదన్నారు.

ఎవరినీ బలవంతంగా సమ్మెలో పాల్గొనేలా చూసినా ఊరుకోమన్నారు. శాంతిభద్రతల సమస్య తలెత్తినప్పుడు కఠినంగా వ్యవహరించాల్సి ఉంటుందన్నారు. ఇంతకుముందు కూడా ఇలాంటి సంఘటనలు జరిగాయని అయితే అప్పుడు రెండు లేదా మూడు గంటలు జరిగేవని అప్పుడు పోలీసులు కల్పించుకోపోయే వారన్నారు. కానీ ఇప్పుడు రోజుల కొద్ది అంటే ప్రజలు ఇబ్బందులు ఎదుర్కొంటారు కాబట్టే తాము కఠినంగా వ్యవహరించాల్సి వస్తుందని వివరణ ఇచ్చారు.

English summary

DGP Dinesh Reddy warned Telanganites today about rail roko.