ప్రశాంత్ భూషణ్‌పై దాడిన స్వాగతించిన బాల్ థాకరే

By Pratap

Published: Friday, October 14, 2011, 17:45 [IST]

న్యూఢిల్లీ: సుప్రీంకోర్టు సీనియర్ న్యాయవాది, టీమ్ అన్నా సభ్యుడు ప్రశాంత్ భూషణ్‌పై దాడి చేసినవారిని శివసేన అధినేత బాల్ థాకరే అభినందించారు. ఈ మేరకు ఆయన శివసేన అధికారిక పత్రిక దోపహర్ కా సామ్నాలో ఓ ప్రకటన చేశారు. దేశవిభజన గురించి మాట్లాడేవారికి ఈ రకమైన గుణపాఠమే చెప్పాలని ఆయన అన్నారు. అలా మాట్లాడేవారు దోషులని, ప్రజలు వారికి గుణపాఠం చెప్పాలని ఆయన అన్నారు. ప్రశాంత్ భూషణ్‌పై ఆయన ఛేంబర్‌లో రెండు రోజుల క్రితం ముగ్గురు వ్యక్తులు దాడి చేశారు.

దాడిచేసినవారిలో ఒక వ్యక్తి శ్రీరాంసేనకు చెందినవాడు కాగా, మరో ఇద్దరు భగత్ సింగ్ సేనకు చెందినవారు. వారిని పోలీసులు అరెస్టు చేశారు. అయితే, ఆ గ్రూప్ మరింత మంది అన్నా మద్దతుదారులపై దాడి చేసింది. ప్రశాంత్ భూషణ్‌పై దాడి చేసిన ముగ్గురికి శుక్రవారం ఢిల్లీ కోర్టు బెయిల్ మంజూరు చేసింది. అంతకు ముందు గురువారం తేజిందర్ పాల్ సింగ్ బగ్గా, విష్ణు గుప్తా, ఇందర్ వర్మ అనే ముగ్గురిని పోలీసులు కోర్టు ముందు హాజరు పరిచారు. కోర్టు వారికి ఒక రోజు జ్యుడిషియల్ రిమాండ్ విధించిది.

ప్రశాంత్ భూషణ్ వ్యాఖ్యలతో అన్నా హజారే విభేదించారు. తమ జట్టులో ప్రశాంత్ భూషణ్‌ను కొనసాగించాలా, వద్దా అనే విషయంపై నిర్ణయం తీసుకుంటామని ఆయన అన్నారు. ప్రశాంత్ భూషణ్ వ్యాఖ్యలు సరైనవి కావని ఆయన అన్నారు.

Published On October 14, 2011