అధికారులొద్దు ముఖ్యమంత్రే రావాలి: చర్చలపై టిఎన్జీవో

హైదరాబాద్: సకల జనుల సమ్మె అంశంపై తాము ప్రభుత్వాధికారులతో చర్చించేది లేదని తమతో చర్చలకు ముఖ్యమంత్రి కిరణ్ కుమార్ రెడ్డి రావాలని తెలంగాణ ఉద్యోగ సంఘాల నేతలు డిమాండ్ చేశారు. సమ్మె విరమించే యత్నంలో భాగంగా శుక్రవారం ప్రభుత్వ ప్రధాన కార్యదర్శితో చర్చలకు పిలిచిన విషయం తెలిసిందే. అయితే మొదట చర్చలకు వెళ్లి తెలంగాణ ప్రజల ఆకాంక్ష తెలియజెప్పాలని నిర్ణయించుకున్నప్పటికీ ఆ తర్వాత ముఖ్యమంత్రి వస్తేనే తాము చర్చలకు సిద్ధమని ప్రకటించారు. ప్రభుత్వ సిఎస్‌తో చర్చలకు వెళ్లే సమస్య లేదన్నారు. మంత్రులతో కానిది అధికారులతో అవుతుందా అని ప్రశ్నించారు. చర్చలకు తామెప్పుడూ సిద్ధమేనని అయితే సిఎం రావాల్సిందేనన్నారు.

ముఖ్యమంత్రి కిరణ్ కుమార్ రెడ్డి సమ్మెపై వాస్తవ నివేదిక కేంద్రానికి పంపించాలని డిమాండ్ చేశారు. తెలంగాణ బిల్లును వెంటనే పార్లమెంటులో ప్రవేశ పెట్టాలని సిఎం కేంద్రంపై ఒత్తిడి తీసుకు రావాలని డిమాండు చేశారు. సమస్య పరిష్కరించాలనే చిత్తశుద్ధి ప్రభుత్వానికి ఉన్నట్లుగా తమకు కనిపించడం లేదని ఆరోపించారు. తమ డిమాండ్లు ప్రభుత్వం ఆమోదించాలని డిమాండ్ చేశారు.

English summary

TNGO employees gave ultimatum to government for talks with government on Sakala Janula Strike.