27 రోజుల తర్వాత రోడ్ల పైకి ఆర్టీసి బస్సులు

హైదరాబాద్: తెలంగాణ వ్యాప్తంగా ఇరవయ్యేడు రోజుల తర్వాత ఆర్టీసి బస్సులు రహదారుల పైకి వచ్చాయి. శనివారం అర్ధరాత్రి నుండి బస్సులు యథావిథిగా తిరుగుతున్నాయి. తెలంగాణలోని అన్ని జిల్లాల్లో ఆర్టీసి ఉద్యోగులు విధులకు హాజరయ్యారు. దీంతో ప్రయాణీకులు సంతోషం వ్యక్తం చేస్తున్నారు. తాము తెలంగాణకు వ్యతిరేకం కాదని కాని బస్సులు బందు చేయడం వల్ల తాము తీవ్ర ఇబ్బందులు ఎదుర్కోవాల్సి వస్తుందని ప్రజలకు ఇబ్బందులు కలుగకుండా తెలంగాణ సాధించాల్సి ఉందని పలువురు ప్రయాణీకులు అభిప్రాయపడ్డారు. సకల జనుల సమ్మెలో భాగంగా గత సెప్టెంబర్ 19వ తేది నుండి ఆర్టీసి కార్మికులు విధులను బహిష్కరించారు. కాగా రెండో రోజు రైలు రోకో కార్యక్రమం కొనసాగుతోంది. రైలు రోకోలో పాల్గొంటున్న వారిపై ప్రభుత్వం కఠినంగా వ్యవహరిస్తుండటంతో ఆదివారం పట్టాల పైకి వచ్చిన వారి సంఖ్య కాస్త తగ్గినట్లుగా కనిపిస్తోంది. పలు చోట్ల రైలు రోకోలో పాల్గొనకుండా పోలీసులు ముందస్తు అరెస్టులు చేశారు. రైల్వే శాఖ పలు రైళ్లను యథావిథిగా తిప్పుతోంది. పరిస్థితిని బట్టి మరికొన్నింటిని పునరుద్ధరించే అవకాశాలు ఉన్నాయి.

మరోవైపు తెలంగాణలో జరుగుతున్న సకల జనుల సమ్మె, సోమవారం జరగనున్న బందుపై చర్చించేందుకు తెలంగాణ రాజకీయ ఐక్య కార్యాచరణ సమితి సాయంత్రం నాలుగు గంటలకు సమావేశం కానున్నదని సమాచారం. ఈ భేటీలో తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు, తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరాం, జెఏసి భాగస్వామ్య పక్షాలు, ఉద్యోగ సంఘాల నేతలు తదితరులు పాల్గొంటారు. సమ్మె నుండి విద్యాసంస్థలను మినహాయించాలని డిమాండ్ చేసిన నేపథ్యంలో దాని పైన కూడా చర్చించే అవకాశముంది.

English summary

Buses rounding on roads after 27 days in Telangana ares.