చంచల్‌గూడ జైలుకు విజయశాంతి, ఆమరణ దీక్ష

By Srinivas

Published: Sunday, October 16, 2011, 9:29 [IST]

హైదరాబాద్: సకల జనుల సమ్మెలో భాగంగా శనివారం జరిగిన రైలు రోకో కార్యక్రమంలో పాల్గొన్న మెదక్ పార్లమెంటు సభ్యురాలు విజయశాంతిని పోలీసులు ఆదివారం చంచల్ గూడ మహిళా జైలుకు తరలించారు. ఇరవై రెండు గంటలుగా విజయశాంతి పోలీసుల అదుపులోనే ఉంది. హైదరాబాదు రైలు రోకోలో పాల్గొన్న తెలంగాణ రాష్ట్ర సమితి శాసనసభ్యులు కల్వకుంట్ల తారక రామారావు, పద్మారావు తదితరులకు అర్ధరాత్రి బెయిలు దొరికినప్పటికీ బెయిలు పత్రాలు పూర్తిగా లేక పోవడంతో విజయశాంతికి మెట్టుగూడ కోర్టులో బెయిలు దొరకలేదు.

అయితే ఆమె ఆరోగ్య పరిస్థితి దృష్ట్యా అర్ధరాత్రే ఆమెను గాంధీ హాస్పిటల్ తరలించి చికిత్స చేయించారు. అనంతరం ఆమెను మళ్లీ మెజిస్ట్రేట్ ముందు ప్రవేశ పెట్టారు. రాత్రి సమయంలో మూడు గంటల పాటు వాదోపవాదాలు జరిగినట్లుగా తెలుస్తోంది. మరోసారి ఆదివారం ఉదయం వాదోపవాదాలు జరిగాయి. మెజిస్ట్రేట్ విజయశాంతితో పాటు మరో ఎడుగురికి ఈ నెల 22వ తేది వరకు రిమాండు విధించారు. కాగా పోలీసుల అదుపులో ఉన్న విజయశాంతి అరెస్టయినప్పటి నుండి అప్రకటిత నిరాహార దీక్ష చేస్తున్నట్లుగా తెలుస్తోంది. చంచల్ గూడ జైలుకు తరలించిన అనంతరం నిరాహార దీక్ష అధికారికంగా ప్రకటించే అవకాశం ఉంది. మరోవైపు సిద్దిపేట శాసనసభశ్ర్యుడు హరీష్ రావును కూడా రిమాండ్‌కు తరలించారు.

Published On October 16, 2011