రాజీనామా చేయాలంటూ పొన్నాల ఇంటి ముట్టడి, ఉద్రిక్తం

By Srinivas

Published: Saturday, October 22, 2011, 13:40 [IST]

వరంగల్/మెదక్: ఇన్‌ఫర్మేషన్ టెక్నాలజీ(ఐటి) శాఖ మంత్రి పొన్నాల లక్ష్మయ్య ఇంటిని సిపిఐ పార్టీ ఆధ్వర్యంలో శనివారం ముట్టడించారు. తెలంగాణ కోసం మంత్రి వెంటనే రాజీనామా చేయాలని డిమాండ్ చేశారు. లేదంటే పరిణామాలు తీవ్రంగా ఉంటాయని హెచ్చరించారు. తెలంగాణకు అనుకూలంగా, పొన్నాలకు, కాంగ్రెసుకు వ్యతిరేకంగా నినాదాలు చేశారు. వారు అక్కడే బైఠాయించడంతో పోలీసులు వారిని వారించే ప్రయత్నాలు చేశారు. అయితే వారు ఎంతకూ తగ్గక పోవటంతో పరిస్థితులు అదుపు తప్పుతాయని భావించిన పోలీసులు ఆందోళనకారులను అదుపులోకి తీసుకొని సుబేదారి పోలీసు స్టేషన్ తరలించారు. అరెస్టు చేసిన వారిని విడుదల చేయాలంటూ తెలంగాణ వాదులు రాస్తా రోకో నిర్వహించారు.

మెదక్ జిల్లాలోని సంగారెడ్డిలో ఉప ముఖ్యమంత్రి దామోదర రాజనర్సింహ ఇంటిని తెలంగాణవాదులు ముట్టడించారు. తెలంగాణ కోసం రాజీనామా చేయాలని డిమాండ్ చేశారు. కాగా సిపిఐ రాష్ట్ర కార్యదర్శి నారాయణ అవినీతికి వ్యతిరేకంగా తన ఇరవై నాలుగు గంటల నిరాహార దీక్షను శనివారం విరమించారు. ఈ సందర్భంగా ఆయన మాట్లాడుతూ సకల జనుల సమ్మె రూపంలో తెలంగాణవాదాన్ని జాతీయ స్థాయిలో వినిపిస్తే మిగతా పనిని రాజకీయ నేతలే చేయాల్సి ఉందన్నారు. తెలంగాణ సమస్యకు రాష్ట్ర విభజనే పరిష్కారమనన్నారు. విజయవాడ పార్లమెంటు సభ్యుడు లగడపాటి రాజగోపాల్ రెచ్చగొట్టే వ్యాఖ్యలు మానుకోవాలన్నారు.

Published On October 22, 2011