హెచ్చార్సీకి భద్రాచలం గొడవ, ఈవోపై ఫిర్యాదు

By Srinivas

Published: Tuesday, October 25, 2011, 16:28 [IST]

ఖమ్మం: ప్రముఖ పుణ్యక్షేత్రం భద్రాచలంలో అధికారులు, అర్చకుల మధ్య గొడవ ముదిరింది. భద్రాచలం ఈవో చంద్రశేఖర ఆజాద్‌పై అర్చకులు మంగళవారం మానవ హక్కుల కమిషన్‌కు ఫిర్యాదు చేశారు. ఈవో తమపై దురుసుగా ప్రవర్తించారని చర్యలు తీసుకోవాలని కోరారు. స్పందించిన హెచ్చార్సీ వచ్చే నెల 14వ తేదీలోగా పూర్తిస్థాయి నివేదిక ఇవ్వాలని దేవాదాయ శాఖను ఆదేశించింది. కాగా ఈ నెల పదమూడో తేదీన ఓ భక్తుడు భద్రాచలం దేవాలయంలోని ప్రధాన అర్చకుడి హారతిలో వంద రూపాయలు వేసిన విషయం తెలిసిందే. సిసి కెమెరాల్లో దాన్ని చూసిన ఆలయ ఈవో అది లంచమంటూ ప్రధాన అర్చకుడిని నిందించాడు.

అర్చకుడిపై చేయి కూడా చేసుకున్నాడు. అనంతరం అర్చకుడి చేతి వేలికి ఉన్న బంగారు ఉంగరాన్ని బలవంతంగా హుండీలో వేయించాడు. ఘటనపై ఆలయ అర్చకులు ఈవోపై మండిపడ్డారు. ఆ తర్వాత ఆయన క్షమాపణలు కూడా చెప్పారు. అయితే ఆలయ ఈవోపై అర్చకులు తీవ్ర అసంతృప్తి వ్యక్తం చేశారు. ఆయన తీరు సరిగా లేదని ఆరోపించారు.

Published On October 25, 2011