యడ్యూరప్పపై మరో దర్యాప్తు, కష్టాల మీద కష్టాలు

By Pratap

Published: Thursday, October 27, 2011, 9:33 [IST]

బెంగళూరు: కర్ణాటక మాజీ ముఖ్యమంత్రి యడ్యూరప్పకు కష్టాల మీద కష్టాల వచ్చి పడుతున్నాయి. జైలులో ఉన్న యడ్యూరప్ప ఆరో అవినీతిపై నెల రోజులలోగా దర్యాప్తు చేయాలని కోర్టు పోలీసులకు బుధవారం ఆదేశాలు జారీ చేసింది. యడ్యూరప్పపై ఆరో అవినీతి కేసుపై దర్యాప్తు చేసి నవంబర్ 26వ తేదీ లోగా నివేదిక సమర్పించాలని లోకాయుక్త ప్రత్యేక కోర్టు న్యాయమూర్తి ఎన్‌కె సుదీంద్ర రావు పోలీసులను ఆదేశించారు. ఈ కేసులో ఇప్పటికే యడ్యూరప్పకు హైకోర్టు ముందస్తు బెయిల్ ఇచ్చింది.

ఇద్దరు న్యాయవాదులు దాఖలు చేసిన అవినీతి, అక్రమ భూ వ్యవహారాలకు సంబంధించిన ఐదు కేసుల్లో రెండు కేసుల్లో యడ్యూరప్ప ప్రస్తుతం జైలులో ఉన్నారు. అప్పర్ భద్ర సాగునీటి ప్రాజెక్టు కాంట్రాక్టు కట్టబెట్టడానికి ఓ ప్రైవేట్ సంస్థ నుంచి యడ్యూరప్ప 13 కోట్ల రూపాయల లంచం తీసుకున్నారనేది ఆరో కేసు. జనతాదళ్ - సెక్యులర్ ప్రజాప్రతినిధి వైయస్‌వి దత్తా చేసిన ఫిర్యాదుపై యడ్యూరప్ప మీద ఈ కేసు నమోదైంది. తక్కువ కోట్ చేసిన సంస్థలను కాదని అత్యధికంగా కోట్ చేసిన ఆర్ఎన్ఎస్ జ్యోతికి లంచం తీసుకుని ఆ కాంట్రాక్టును కట్టబెట్టారనేది ఆరోపణ. ప్రతిగా జ్యోతి యడ్యూరప్పకు కుమారుడు రాఘవేంద్ర, అల్లుడు సోహన్ కుమార్‌లకు చెందిన ధవళగిరి డెవలపర్స్ లిమిటెడ్‌కు 13 కోట్ల రూపాయలు లంచంగా ఇచ్చారని ఆరోపణలు వచ్చాయి.

Published On October 27, 2011