టిఆర్ఎస్ ఎమ్మెల్యేల దీక్షకు బిజెపి, సిపిఐ దూరం

By Srinivas

Published: Saturday, October 29, 2011, 12:15 [IST]

హైదరాబాద్: ప్రత్యేక రాష్ట్ర సాధనలో భాగంగా తెలంగాణ రాజకీయ ఐక్య కార్యాచరణ సమితి ఆధ్వర్యంలో నవంబరు 1వ తేది నుండి మూడు రోజుల పాటు చేపట్టనున్న దీక్షలకు భారతీయ జనతా పార్టీ, సిపిఐ పార్టీల ఎమ్మెల్యేలు దూరంగా ఉండాలని నిర్ణయించుకున్నారు. జెఏసికి సిపిఐ బయట నుండి మద్దతు ఇస్తుండగా, బిజెపి భాగస్వామ్య పార్టీ. తెలంగాణ కోసం ఏ కార్యక్రమం చేపట్టినా క్రెడిట్ టిఆర్ఎస్‌కు దక్కడం, తెలంగాణ కోసమే పార్టీ అని చెప్పుకునే ఆ పార్టీ పత్రిక పోలవరం టెండర్ల అంశంలో వివాదాస్పదం కావడంతో ఆ పార్టీ ప్రధానంగా చేసే కార్యక్రమాలకు దూరంగా ఉండాలని నిర్ణయించుకున్నట్లుగా కనిపిస్తోంది. ఈ 72 గంటల దీక్ష జెఏసి ఆధ్వర్యంలో జరుగుతున్నప్పటికీ క్రెడిట్ అంతా టిఆర్ఎస్‌కే దక్కుతుంది. ఇటీవల చేపట్టిన సకల జనుల సమ్మె, రైలు రోకో తదితర కార్యక్రమాలలో టిఆర్ఎస్‌తో పాటు బిజెపి, సిపిఐ ప్రధాన పాత్ర పోషించాయి. అయినప్పటికీ ఆ పార్టీలకి ఎలాంటి ఫలితం దక్కలేదు. కానీ టిఆర్ఎస్ మాత్రం భారీగా లాభపడింది. ఆ తర్వాత పోలవరం టెండర్ల అంశంతో ఆ పార్టీ పట్ల ప్రజల్లో విశ్వాసం సన్నగిల్లడం వేరే విషయం.

ఇప్పుడు చేపట్టే దీక్షలు కూడా తమ రాజకీయ మైలేజికి ఏవిధంగానూ ఉపయోగపడవని భావించే ఆ పార్టీలు దూరంగా ఉండేందుకు నిర్ణయించుకున్నట్లుగా తెలుస్తోంది. బిజెపి అగ్రనేత లాల్ కృష్ణ అద్వానీ యాత్ర పార్టీ తెలంగాణ శ్రేణుల్లో ఉత్సాహాన్ని నింపింది. అద్వానికి తెలంగాణలో ప్రజలు బ్రహ్మరథం పట్టారు. ఎంతగా అంటే బిజెపికి వచ్చిన స్పందన చూసి టిఆర్ఎస్ తీవ్రంగా మథన పడిందట. ఎలాగూ జెఏసిలో తమ మాట అంతగా చెల్లుబాటు కావడం లేదు, అందులోని ప్రతి కార్యక్రమం క్రెడిట్ టిఆర్ఎస్‌కే వెళుతోంది. కాబట్టి సొంత కార్యాచరణతో ముందుకు వెళ్లాలని బిజెపి వర్గాలు భావిస్తున్నట్లుగా సమాచారం. ఇందుకోసం స్థానిక నాయకుల నుండి రాష్ట్ర అధిష్టానానికి విజ్ఞప్తులు కూడా వస్తున్నాయట. అయితే బిజెపి సీనియర్ నేత సిహెచ్ విద్యాసాగర రావు మాత్రం తాము జెఏసిలో పెద్దన్న పాత్ర పోషిస్తామని, జెఏసి నుండి బయటకు వెళతామనే వాదనలు ఉద్యమాన్ని దెబ్బతీయడంలో జరుగుతున్న కుట్ర అని శుక్రవారం అన్నారు. సిపిఐ కూడా గులాబి దండును నమ్ముకోవడం కంటే సొంత కార్యాచరణతో ముందుకెళ్లడమే ఉత్తమమనే భావనలో ఉన్నట్లుగా కనిపిస్తోంది.

Published On October 29, 2011