గాలి కేసు: సబితా ఇంద్రారెడ్డిని విచారించిన సిబిఐ

By Srinivas

Published: Saturday, October 29, 2011, 8:57 [IST]

హైదరాబాద్: కర్నాటక మాజీ మంత్రి, భారతీయ జనతా పార్టీ సీనియర్ నేత గాలి జనార్ధన్ రెడ్డికి చెందిన ఓబుళాపురం మైనింగ్ కేసులో హోంమంత్రి సబితా ఇంద్రారెడ్డిని సిబిఐ అధికారులు శుక్రవారం రాత్రి విచారించారు. సుమారు రెండు గంటల పాటు ఆమెను సిబిఐ అధికారులు ప్రశ్నించినట్లుగా తెలుస్తోంది. సబితా ఇంద్రారెడ్డి 2004లో భూగర్భ గనుల శాఖ మంత్రిగా పని చేశారు. అదే సమయంలో గాలికి గనుల కేటాయింపు జరిగిందన్న వాదనలు ఉన్నాయి. ఈ నేపథ్యంలో గనుల లీజు కేటాయింపులు, ఆమె హయాంలో సంతకాలు జరిగిన రెండు ఫైళ్లపై ప్రశ్నించారు. సబిత హయాంలోనే గాలికి ఆరు లీజుల కేటాయింపు జరిగింది.

సబితా ఇంద్రా రెడ్డి తర్వాత మంత్రులు పొన్నాల లక్ష్మయ్య, శత్రుచర్లను ప్రశ్నించే అవకాశాలున్నాయి. అలాగే ఓబుళాపురం గనుల్లో అక్రమాలు జరిగాయని వాటిని నిరూపిస్తామని మూడేళ్ల క్రితం అక్కడ సందర్శించిన అఖిల పక్షం నేతలను కూడా సిబిఐ కలిసి ప్రశ్నించే అవకాశముంది. సబితకు ముందు ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణను సిబిఐ అధికారులు విచారించిన విషయం తెలిసిందే.

Published On October 29, 2011