దాడి ఘటన విచారించి జగన్ పేరు తొలగిస్తాం: డిఐజి

By Srinivas

Published: Saturday, October 29, 2011, 14:40 [IST]

హైదరాబాద్: పులివెందుల పోలీసు స్టేషన్ పైన దాడి చేసిన సంఘటనలో వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డికి ఎలాంటి సంబంధం లేకుంటే విచారించి ఆయన పేరును తొలగిస్తామని కర్నూలు రేంజ్ డిఐజి అనిల్ కుమార్ శనివారం అన్నారు. ఆయనతో సహా సంబంధం లేని వారందరి పేర్లు తొలగిస్తామని చెప్పారు. పోలీసు స్టేషన్ పైన దాడి చేసినందు వల్లనే మూడు వందల మందిపై కేసు నమోదు చేసినట్లు చెప్పారు. విచారణ అనంతరమే తదుపరి చర్యలు ఉంటాయన్నారు.

కాగా ఇటీవల పులివెందుల పోలీసులు తమ పార్టీకి చెందిన ఓ యువకుడిని దారుణంగా చితకబాదారని వైయస్ జగన్‌తో సహా పలువురు వైయస్సార్ కాంగ్రెసు పార్టీ కార్యకర్తలు పోలీసు స్టేషన్ ముందు ధర్నాకు దిగిన విషయం తెలిసిందే. ఆ సంఘటనలో కొందరు పోలీసు స్టేషన్ పైన దాడి చేసినట్లు కేసు నమోదైంది. అయితే దాడి చేసిన విషయాన్ని జగన్ ఖండించారు. తాము శాంతియుతంగా ధర్నాకు దిగామని, యువకుడిని నిర్ధాక్షిణ్యంగా పోలీసులు కొడితే ప్రశ్నించడానికే ఆందోళనకు దిగామన్నారు.

Published On October 29, 2011