గాలి గనుల కేసులో 4న సిబిఐ ముందుకు జగన్

By Srinivas

Published: Wednesday, November 2, 2011, 14:18 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డికి సెంట్రల్ బ్యూరో ఆఫ్ ఇన్వెస్టిగేషన్(సిబిఐ) బుధవారం కర్నాటక మాజీ మంత్రి, భారతీయ జనతా పార్టీ సీనియర్ నేత గాలి జనార్ధన్ రెడ్డి ఓబుళాపురం అక్రమ మైనింగ్ కేసులో నోటీసులు జారీ చేశారు. శుక్రవారం తమ ముందు విచారణకు హాజరు కావాల్సిందిగా వారు జగన్‌ను ఆదేశించారు. రెడ్ గోల్డులో వాటాలు ఉన్నందున తమ ముందుకు హాజరు కావాలని సిబిఐ జగన్‌ను ఆదేశించింది. నాలుగో తేది జగన్ స్వయంగా హాజరు కావాలని నోటీసులో పేర్కొంది. దీనిని సిబిఐ జెడి లక్ష్మీ నారాయణ ధృవీకరించారు.

కాగా ఇటీవలే సిబిఐ అధికారులు గాలి జనార్ధన్ రెడ్డి గనుల కేసుపై హోంమంత్రి సబితా ఇంద్రారెడ్డి, ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ, గనుల శాఖ అధికారులు శ్రీలక్ష్మి తదితరులను విచారించిన విషయం తెలిసిందే. ఇటీవలె శ్రీ పొట్టి శ్రీరాములు నెల్లూరు జిల్లాలోని కృష్ణపట్నం రేవులో కూడా తనిఖీలు నిర్వహించారు. కాగా ఇప్పటి వరకు జగన్ తన ఆస్తుల విషయంలో విచారణ ఎదుర్కొంటున్న విషయం తెలిసిందే. తాజాగా గాలి కేసులో నోటీసులు జారీ చేయడం విశేషం.

Published On November 2, 2011