ఏ క్షణంలోనైనా తెలంగాణ ప్రకటన: పిసిసి చీఫ్ బొత్స

By Srinivas

Published: Sunday, November 6, 2011, 18:22 [IST]

హైదరాబాద్: కేంద్రం త్వరలో తెలంగాణపై శాశ్వత పరిష్కారం దిశగా నిర్ణయం తీసుకుంటుందని ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ ఆదివారం అన్నారు. మంత్రులు శ్రీధర్ బాబు, బస్వరాజు సారయ్యలతో కలిసి బొత్స సాయంత్రం నిమ్స్‌లో చికిత్స పొందుతున్న మాజీ మంత్రి కోమటిరెడ్డి వెంకట్ రెడ్డిని పరామర్శించారు. అనంతరం ఆయన మీడియాతో మాట్లాడారు. ఏ క్షణంలోనైనా తెలంగాణ ప్రకటన రావచ్చునని, రేపు రావచ్చు, పార్లమెంటు సమావేశాలకు ముందు రావచ్చునని ఆయన అన్నారు. తెలంగాణపై సానుకూల ప్రకటన వెలువడుతుందని ఆశిస్తున్నట్లు ఆయన తెలిపారు. తెలంగాణపై అధిష్టానం త్వరలో నిర్ణయం తీసుకుంటుందన్నారు. ఇదే విషయాన్ని తాను కోమటిరెడ్డికి చెప్పానన్నాని ఆయన సానుకూలంగా స్పందిస్తారనే తాను భావిస్తున్నానన్నారు. ఆయనను దీక్ష విరమించాలని తాను కోరానన్నారు. ఆయన ఆరోగ్యం నిలకడగానే ఉందన్నారు. పార్టీ, ప్రభుత్వం వేరు వేరు కాదన్నారు. కాగా బొత్స మాట్లాడుతున్న సమయంలో పలువురు కార్యకర్తలు అడ్డుకునే ప్రయత్నం చేశారు. అయితే బొత్స వారికి సర్ది చెప్పారు. కోమటిరెడ్డి వెంకటరెడ్డిని అరెస్టు చేయలేదని, ఆరోగ్యం దృష్ట్యా అస్పత్రికి తరలించామని ఆయన చెప్పారు.

అంతకుముందు కార్మిక శాఖ మంత్రి దానం నాగేందర్ కోమటిరెడ్డిని పరామర్శించారు. త్వరలో కేంద్రం తెలంగాణపై ఓ నిర్ణయం తీసుకుంటుందన్నారు. కోమటిరెడ్డి వద్దకు కేంద్రం ఓ బృందాన్ని పంపేలోగానే ఆయన ఆరోగ్యం క్షీణించిందన్నారు. మంత్రిగా కాకుండా ఓ సన్నిహితుడిగా దీక్ష విరమించాలని కోరినట్లు చెప్పారు. బక్రీద్ తర్వాత తెలంగాణపై నిర్ణయం వెలువడే అవకాశముందన్నారు. కాగా బొత్స దీక్ష విరమించాలని కోరడంలో తప్పు లేదని అయితే వెంకట్ రెడ్డి దీక్ష విరమిస్తానని చెప్పలేదని ఎంపీ కోమటిరెడ్డి రాజగోపాల్ రెడ్డి అన్నారు. ఆరు రోజులుగా దీక్ష చేస్తున్నా ప్రభుత్వం స్పందించలేదన్నారు. రంగారెడ్డి, హైదరాబాదులలో తెలంగాణవాదం ఉందో లేదో ఎన్నికలకు వెళితే తెలుస్తుందన్నారు. ముఖ్యమంత్రి కిరణ్ కుమార్ రెడ్డి కేంద్రానికి తప్పుడు నివేదికలు పంపిస్తున్నారని ఆరోపించారు.

కోమటిరెడ్డి వెంకటరెడ్డిని తెలంగాణ ప్రజాఫ్రంట్ అధ్యక్షుడు గద్దర్, సిపిఐ రాష్ట్ర కార్యదర్శి కె. నారాయణ కూడా పరామర్శించారు. ఉప ఎన్నికల వల్ల తెలంగాణ రాదని గద్దర్ అన్నారు. ప్రజల్లోకి వచ్చి ఉద్యమం చేస్తేనే తెలంగాణ వస్తుందని ఆయన అన్నారు. ఈ నెల 8వ తేదీ తర్వాత తెలంగాణపై ప్రకటన వస్తుందని అంటున్నారని, అది తెలంగాణకు వ్యతిరేకంగా వస్తే అగ్గి రాజుకుంటుందని నారాయణ అన్నారు. తెలంగాణకు ప్యాకేజీలంటే తెలంగాణలో కాంగ్రెసు ప్యాక్ కావడం ఖాయమని ఆయన అన్నారు.

Published On November 6, 2011