కేక్ కట్ చేయడం కాదు: తెలంగాణపై కెకె సంచలనం

By Srinivas

Published: Monday, November 7, 2011, 16:56 [IST]

హైదరాబాద్: తెలంగాణపై కాంగ్రెసు పార్టీ సీనియర్ నేత కె కేశవరావు సోమవారం సంచలన వ్యాఖ్యలు చేశారు. ప్రత్యేక రాష్ట్రం ఇవ్వడమంటే కేక్ కట్ చేసినంత ఈజీ కాదని, కాగితం చించడం కాదని దానికో ప్రాసెస్ ఉందన్నారు. అలా అని తెలంగాణను కేంద్రం నాన్చితే చూస్తూ ఊరుకునేది లేదన్నారు. కేంద్రం తెలంగాణ అంశం త్వరగా తేల్చాలన్నారు. ఇంకా జాప్యమైతే సహనం నశిస్తుందన్నారు. మమ్మల్ని పిల్లల్లా ఎవరూ బుజ్జగించ లేరన్నారు. ప్రాంతీయ మండళ్లు, ప్రత్యేక ప్యాకేజీలు తమకు అవసరం లేదని తెలంగాణ మాత్రమే కావాలన్నారు. తాము కాంగ్రెసువాదులుగానే ప్రత్యేక తెలంగాణ రాష్ట్రాన్ని సాధిస్తామని ఆశాభావం వ్యక్తం చేశారు. తాము తెలంగాణ తప్ప దేనినీ అంగీకరించే ప్రసక్తి లేదన్నారు.

మిలియన్ మార్చ్ సందర్భంగా గొడవ జరిగితే హింస అన్నారని, శాంతియుతంగా ఆందోళన చేస్తే ఉద్యమం లేదని కేంద్రమంత్రి చిదంబరం అంటున్నారని ఆవేదన వ్యక్తం చేశారు. ఇందుకు ముఖ్యమంత్రి కిరణ్ కుమార్ రెడ్డియే బాధ్యుడన్నారు. ఆయన తప్పుడు నివేదికలను కేంద్రానికి పంపిస్తున్నారని ఆరోపించారు. శాంతియుతంగా ఉద్యమిస్తున్న వారిపై పిడి యాక్టులంటూ కేసులు పెడుతూ రెచ్చగొట్ట వద్దని సూచించారు. అరెస్టులకే కాదని తూటాలకు తాము భయపడేది లేదన్నారు. ప్రభుత్వం రెచ్చగొట్టే చర్యలకు పూనుకుంటే తీవ్ర పరిణామాలు ఉంటాయన్నారు.

మాజీ మంత్రి కోమటిరెడ్డి వెంకట్ రెడ్డిని అరెస్టు చేసిన తీరు బాగా లేదన్నారు. ఆయన తన దీక్షను కొనసాగిస్తున్నారని చెప్పారు. దీక్ష విరమింప జేసేందుకు తాము ఏం చేయాలో ఆలోచిస్తున్నామన్నారు. తెలంగాణ కోసం ఎందరో బలిదానాలు చేశారన్నారు. కోమటిరెడ్డి అరెస్టుకు నిరసనగా మంగళవారం నల్గొండ జిల్లా బందుకు పిలుపు ఇస్తున్నట్లు చెప్పారు.

Published On November 7, 2011