తెలంగాణకోసం ఓయు విద్యార్థి ఆత్మహత్య, ర్యాలీ ఉద్రిక్తం

By Srinivas

Published: Monday, November 7, 2011, 16:29 [IST]

హైదరాబాద్: ప్రత్యేక తెలంగాణ రాష్ట్రాన్ని కోరుతూ అదిలాబాద్ జిల్లా మంచిర్యాలలో ఉస్మానియా విశ్వవిద్యాలయ విద్యార్థి ఆత్మహత్యకు సంతాప సూచకంగా తలపెట్టిన విద్యార్థుల ర్యాలీ సోమవారం ఉద్రిక్తతకు దారి తీసింది. సుమారు వంద మంది విద్యార్థులు ఉస్మానియా విశ్వవిద్యాలయ ఆర్ట్స్ కళాశాల నుండి తార్నాకకు ర్యాలీగా బయలు దేరారు. పోలీసులు విద్యార్థులను బిఇడి కళాశాల వద్ద అడ్డుకున్నారు. తార్నాక వైపు వెళితే మరింత ఉద్రిక్త పరిస్థితులు ఉంటాయనే ఉద్దేశ్యంతో భారీగా మోహరించిన పోలీసులు వారిని ముందుకు వెళ్లేందుకు అంగీకరించలేదు. పోలీసులు, విద్యార్థులకు మధ్య వాగ్వాదం చోటు చేసుకుంది. ఆ తర్వాత విద్యార్థులు పోలీసులపై రాళ్లు రువ్వారు. ముఖ్యమంత్రి కిరణ్ కుమార్ రెడ్డికి వ్యతిరేకంగా తెలంగాణకు అనుకూలంగా నినాదాలు చేశారు. పోలీసులు కూడా విద్యార్థులపై బాష్పవాయువును ప్రయోగించారు.

కాగా సోమవారం ఉదయం మంచిర్యాల రైల్వే స్టేషన్‌లో రైలు కింద పడి నగేష్ అనే ఉస్మానియా విశ్వవిద్యాలయ విద్యార్థి ఆత్మహత్య చేసుకున్నాడు. ఘటనాస్థలంలో తాను తెలంగాణ కోసమే ఆత్మహత్య చేసుకుంటున్నట్లు తెలుపుతూ ఏఐసిసి అధ్యక్షురాలు సోనియా గాంధీ, ప్రధానమంత్రి మన్మోహన్ సింగ్‌కు రాసిన లేఖ లభించింది. మృతుడు కాగజ్ నగర్ మండలానికి చెందిన చింతలగూడ వాసి. నగేష్ మృతదేహాన్ని పోస్టుమార్టం నిమిత్తం హాస్పిటల్ తరలించారు. నగేష్ మృతదేహాన్ని తమకు అప్పగించాలని టిఆర్ఎస్ శాసనసభ్యుడు సమ్మయ్య ప్రభుత్వాసుపత్రి ముందు బైఠాయించారు.

Published On November 7, 2011