ఉద్యోగాల పేరుతో సాఫ్టువేర్ కంపెనీ కుచ్చుటోపీ

By Srinivas

Published: Tuesday, November 8, 2011, 15:13 [IST]

బెంగళూరు: కర్నాటక రాజధాని బెంగళూరులో ఓ సాఫ్టువేర్ కంపెనీ బిటెక్, ఎంఎస్‌సి, ఇంజినీర్ తదితర విద్యార్థులకు ఉద్యోగాలను ఎరవేసి పెద్ద మొత్తంలో వారి నుండి డబ్బులు సేకరించి మోసగించింది. బెంగళూరులో ఎంఎస్ టెక్నో గ్రూప్ పేరుతో ఓ కంపెనీ వెలిసింది. ఉద్యోగాల పేరుతో నిరుద్యోగులను ఎర వేసింది. ఒక్కో అభ్యర్థి నుండి సుమారు ముప్పై అయిదు వేల నుండి లక్ష రూపాయల వరకు సేకరించింది. ఇలా సుమారు ముప్పై వేల మంది ఇంజినీర్ల నుండి డబ్బులు సేకరించింది. ఉద్యోగం కోసం సదరు సంస్థకు డబ్బులు ఇచ్చిన వారిలో మన రాష్ట్రానికి చెందిన వారు మూడు వేల మంది వరకు ఉన్నారు.

డబ్బులు చెల్లించిన వారందరికీ సెప్టెంబరులో ఉద్యోగాలు ఇస్తామని చెప్పారు. కానీ ఇప్పటి వరకు ఉద్యోగం ఇవ్వలేదు. పలువురు బాధితులు గతంలోనే కోరమండలం పోలీసు స్టేషన్‌లో ఈ విషయమై ఫిర్యాదు చేశారు. అయితే పోలీసులు నిర్లక్ష్యం వహించారు. దీంతో వేయి మంది వరకు బాధితులు మంగళవారం కోరమండలం పోలీసు స్టేషన్ ముందు ఆందోళనకు దిగారు.

Published On November 8, 2011