వైయస్ జగన్ వర్గం శానససభ్యుల్లో గుబులు

By Pratap

Published: Tuesday, November 15, 2011, 10:38 [IST]

హైదరాబాద్: శాసనసభ స్పీకర్ నాదెండ్ల మనోహర్ శాసనసభ్యుల రాజీనామాలపై తన నిర్ణయాన్ని వెలువరించడం ప్రారంభించడంతో వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్గానికి చెందిన కొంత మంది శానససభ్యుల్లో గుబులు ప్రారంభమైనట్లు చెబుతున్నారు. తమ రాజీనామాలను స్పీకర్ ఆమోదించరనే దీమాతో ఉన్న శాసనసభ్యుల్లో నోట్లో పచ్చి వెలక్కాయ పడినట్లయింది. నాగం జనార్దన్ రెడ్డి, నల్లపురెడ్డి ప్రసన్న కుమార్ రెడ్డి రాజీనామాలను స్పీకర్ ఆమోదించడంతో జగన్ వర్గం శాసనసభ్యులు కొంత మంది పునరాలోచనలో పడినట్లు చెబుతున్నారు. మరో ఇద్దరు శాసనసభ్యులను కూడా ఆయన రాజీనామాలపై నిర్ణంయ తీసుకునేందుకు పిలిచారు. రాజీనామాల వ్యవహారాన్ని స్పీకర్ శాసనసభా సమావేశాలు ప్రారంభమయ్యే లోగా తేల్చేయాలనే ఉద్దేశంతో ఉన్నారు.

రాజీనామాలను పరిష్కరించే విషయంలో స్పీకర్ ఓ పద్ధతిని అనుసరిస్తున్నట్లు అర్థమవుతోంది. పార్టీలకు కూడా రాజీనామా చేసిన శాసనసభ్యులపై ఆయన మొదట దృష్టి సారించినట్లు స్పష్టమవుతోంది. నాగం జనార్దన్ రెడ్డి, నల్లపురెడ్డి ప్రసన్న కుమార్ రెడ్డి శాసనసభా సభ్యత్వాలకే కాకుండా తెలుగుదేశం పార్టీకి కూడా రాజీనామా చేశారు. తదనంతరం స్పీకర్ ఆహ్వానాన్ని అందుకున్న శాసనసభ్యులు కూడా పార్టీకి రాజీనామా చేసినవారే. వైయస్ జగన్ వర్గానికి చెందిన శాసనసభ్యులు తమ ఎమ్మెల్యే పదవులకు మాత్రమే కాకుండా కాంగ్రెసు పార్టీకి కూడా రాజీనామా చేశారు. దీంతో తమ రాజీనామాలు ఆమోదం పొందుతాయనే భయం వారిని పీడిస్తున్నట్లు చెబుతున్నారు.

కొంత మంది శాసనసభ్యులు సోమవారం స్పీకర్‌ను కలిసి తమ రాజీనామాలను ఆమోదించవద్దని కోరినట్లు సమాచారం. పది నుంచి 12 మంది శాసనసభ్యులు తిరిగి కాంగ్రెసులోకి రావడానికి ప్రయత్నాలు ప్రారంభించారని వార్తలు వస్తున్నాయి. ఆళ్ల నాని పశ్చిమ గోదావరి జిల్లాలో ముఖ్యమంత్రి రచ్చబండ కార్యక్రమానికి స్వయంగా ఏర్పాట్లు చేశారు. అందుకు ఆయన ముఖ్యమంత్రిని కూడా కలిశారు. వైయస్ జగన్ వ్యవహార శైలి నచ్చక, రాజకీయ భవిష్యత్తుపై ఆందోళనతో తిరిగి వారు కాంగ్రెసులోకి రావాలని అనుకుంటున్నట్లు తెలుస్తోంది.

Published On November 15, 2011