గాలి కేసులో శ్రీలక్ష్మిని నాన్‌స్టాప్‌గా విచారిస్తున్న సిబిఐ

హైదరాబాద్: కర్ణాటక మాజీ మంత్రి గాలి జనార్దన్ రెడ్డి గనుల అక్రమ మైనింగ్ కేసులో సీనియర్ ఐఎఎస్ అధికారి శ్రీలక్ష్మిని సిబిఐ అధికారులు శనివారం నాన్ స్టాప్‌గా విచారిస్తున్నారు. ఆమె శనివారం ఉదయం పదిన్నర గంటల ప్రాంతంలో సిబిఐ కార్యాలయానికి తన సొంత వాహనంలో వచ్చారు. ఆ తర్వాత గంటన్నరకే ఆమె సిబిఐ కార్యాలయం నుంచి వెళ్లిపోయినట్లు వార్తలు వచ్చాయి. తనకు ఆరోగ్యం సరిగా లేదని మెడికల్ సర్టిఫికెట్‌ను సమర్పించడంతో సిబిఐ అధికారులు ఆమెను వదిలేసినట్లు భావించారు. కానీ, ఆమెను సిబిఐ అధికారులు తమ వాహనంలో హైదరాబాదులోని అశోక్‌నగర్‌లో గల సిండికేట్ బ్యాంకుకు తీసికెళ్లినట్లు సమాచారం అందింది. అక్కడే ఆమెను దాదాపు ఏడు గంటల పాటు విచారించారు.

సిండికేట్ బ్యాంకులో శ్రీలక్ష్మి ఖాతాలను సిబిఐ అధికారులు పరిశీలించారు. ఆమె బ్యాంక్ లాకర్లను తెరిచారు. వాటిలోంచి నగదును, పత్రాలను, బంగారు నగలును స్వాధీనం చేసుకున్నారు. గనుల యజమాని శశికుమార్ ఎదుట శ్రీలక్ష్మిని సిబిఐ అధికారులు విచారించారు. శ్రీలక్ష్మి తనను లంచం అడిగినట్లు శశికుమార్ ఇంతకు ముందు ఆరోపించారు. దానిపై ఇద్దరిని ముఖాముఖి కూర్చోబెట్టి సిబిఐ అధికారులు విచారించినట్లు సమాచారం. సిండికేట్ బ్యాంకు నుంచి ఆమెను కోఠీలో గల సిబిఐ కార్యాలయానికి తీసుకొచ్చారు. సాయంత్రం పొద్దుపోయే వరకు కూడా శ్రీలక్ష్మిని సిబిఐ అధికారులు విచారిస్తూనే ఉన్నారు. సిబిఐ కార్యాలయం వద్ద భారీ పోలీసు బందోబస్తు ఏర్పాటు చేశారు. శ్రీలక్ష్మిని ఎప్పుడైనా అరెస్టు చేసే అవకాశాలున్నట్లు ప్రచారం జరుగుతోంది.

English summary

Senior IAs officer Srilaxmi was grilled by CBI today non stop in Gali Janardhan Reddy's illegal mining case.