వెలుగు చూస్తున్న ఇద్దరు ఐఎఎస్‌ల మరిన్ని లీలలు

By Pratap

Published: Monday, November 21, 2011, 14:24 [IST]

హైదరాబాద్: అప్పటి గనుల శాఖ డైరైక్టర్ రాజగోపాల్, అప్పటి పరిశ్రమల శాఖ కార్యదర్శి శ్రీలక్ష్మి మైనింగ్ లీజుల వ్యవహారాలు మరిన్ని బయటపడుతున్నారు. తాజాగా బాలకృష్ణా రెడ్డి అనే గనుల వ్యాపారి వారిద్దరిపై ఆరోపణలు చేశారు. కర్నూలు జిల్లా డోన్ మైనింగ్ లీజులు తనకు దక్కకుండా ఆ ఇద్దరు అధికారులు చేశారని ఆయన సోమవారం మీడియా ప్రతినిధులతో చెప్పారు. రాజగోపాల్‌ను నాంపల్లి కోర్టులో హాజరు పరిచే సమయంలో మైనింగ్ లీజుల కేసులో తనను సాక్షిగా పరిగణించాలని బాలకృష్ణా రెడ్డి కోరారు. అయితే, అందుకు కోర్టు అభ్యంతరం తెలిపింది. అలా కావాలంటే న్యాయవాది ద్వారా రావాలని లేదా సిబిఐకి ఫిర్యాదు చేసుకోవచ్చునని కోర్టు సూచించింది. దాంతో ఆయన మీడియా ప్రతినిధులతో మాట్లాడారు. రాజగోపాల్, శ్రీలక్ష్మి వ్యవహారాలపై సిబిఐకి ఫిర్యాదు చేయనున్నట్లు ఆయన తెలిపారు.

ఓబుళాపురం మైనింగ్ వ్యవహారాల్లోనే కాకుండా ఇతర మైనింగ్ వ్యవహారాల్లోనూ రాజగోపాల్, శ్రీలక్ష్మి అక్రమాలకు పాల్పడినట్లు ఆరోపణలు వస్తున్నాయి. 2004 నుంచి కడప, కర్నూలు, ఖమ్మం జిల్లాల్లోని మైనింగ్ లీజులను పెండింగులో పెడుతూ వచ్చారని, తాము 2005లో హైకోర్టుకు వెళ్తే తమకు అనుకూలంగా తీర్పు వచ్చిందని, అయినా ఆ ఇద్దరు ఐఎఎస్ అధికారులు పట్టించుకోలేదని ఆయన వివరించారు. తాము కోర్టు ధిక్కారం కింద కేసు వేస్తామని హెచ్చరిస్తే ముఖ్యమంత్రి వైయస్ రాజశేఖర రెడ్డిని గానీ అప్పటి ప్రభుత్వ సలహాదారు కెవిపి రామచందర్ రావును గానీ కలవాలని శ్రీలక్ష్మి చెప్పారని ఆయన చెప్పారు.

Published On November 21, 2011