సంచలనం జరగొచ్చు: జగన్ ఎమ్మెల్యే కొండా సురేఖ

By Srinivas

Published: Thursday, November 24, 2011, 14:15 [IST]

హైదరాబాద్: భవిష్యత్తులో ఎలాంటి సంచలనమైనా జరగవచ్చునని వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి వర్గం కాంగ్రెసు పార్టీ శాసనసభ్యురాలు కొండా సురేఖ గురువారం అన్నారు. లోటస్ పాండులోని జగన్ ఇంట్లో గురువారం ఎమ్మెల్యేలు సమావేశమయ్యారు. అనంతరం కొండా సురేఖ మీడియాతో మాట్లాడారు. రాజకీయాల్లో ఎప్పుడు ఏమైనా జరగొచ్చునని, ముందు ముందు అనుకోని పరిణామాలు ఎదురు కావచ్చునన్నారు. ప్రస్తుతం కొందరు అటువాళ్లు ఇటు ఇటువాళ్లు అటు వెళుతున్నారన్నారు. ముందు ముందు పరిణామాలు మారవచ్చునని అభిప్రాయపడ్డారు.

ప్రస్తుతం తాము అసెంబ్లీలో అనుసరించాల్సిన వ్యూహంపై చర్చించామని ఆమె స్పష్టం చేశారు. ఏ నిర్ణయం తీసుకున్నా అందరం కట్టుబడి ఉంటామని చెప్పారు. ఆకస్మికంగా ఎలాంటి నిర్ణయాలు అయినా జరగవచ్చునన్నారు. కాగా ఈ సమావేశానికి ఇరవై మంది శాసనసభ్యులు, ఒక పార్లమెంటు సభ్యుడు హాజరయ్యారు. ఎనిమిది మంది శాసనసభ్యులు గైర్హాజరయ్యారు. గైర్హాజరైన వారిలో అనపర్తి ఎమ్మెల్యే నల్లమిల్లి శేషా రెడ్డి తాను కాంగ్రెసులోనే ఉంటానని ఇప్పటికే ప్రకటించారు. జయసుధ, కొర్ల భారతి, కుంజా సత్యవతి కూడా కాంగ్రెసులోనే ఉండే అవకాశాలు ఉన్నాయి.

Published On November 24, 2011