మవోయిస్టు అగ్రనేత కిషన్‌జీ హతం, మీడియా కథనాలు

కోల్‌కతా: మావోయిస్టు అగ్రనేత కిషన్‌జీ అలియాస్ మల్లోజుల కోటేశ్వర రావు హతమైనట్లు వార్తలు వస్తున్నాయి. పశ్చిమ బెంగాల్ టీవి చానెళ్లు కిషన్‌జీని ప్రత్యేక బలగాలు హతమార్చినట్లు కథనాలను ప్రసారం చేస్తున్నాయి. కిషన్‌జీతో పాటు సుచిత్రో మెహతా కూడా హతమైనట్లు వార్తలు ప్రసారమవుతున్నాయి. తృణమూల్ కాంగ్రెసుతో దోస్తీ బెడిసికొట్టి ఆ పార్టీ అధినేత, ముఖ్యమంత్రి మమతా బెనర్జీ కత్తి కట్టిన నేపథ్యంలో కిషన్‌జీ కోసం విస్తృతంగా వేట ప్రారంభమైంది. కిషన్‌జీ ఆంధ్రప్రదేశ్‌లో కరీంనగర్ జిల్లాకు చెందినవాడు. ఆయన ప్రస్తుతం పశ్చిమ బెంగాల్, ఒరిస్సా రాష్ట్రాల బాధ్యతలు నిర్వహిస్తున్నాడు.

మావోయిస్టు అగ్రనేత కిషన్‌జీని భద్రతా బలగాలను చుట్టుముట్టినట్లు బుధవారం సాయంత్రం వార్తలు వచ్చాయి. అయితే, అతను తప్పించుకున్నట్లు అందరూ భావించారు. కానీ అతను ప్రత్యేక బలగాల చేతిలో హతమైనట్లు గురువారం వార్తలు ప్రసారమవుతున్నాయి. కిషన్‌జీ ఉన్నట్టు అనుమానించిన జంగల్ మహల్ ప్రాంతాన్ని పశ్చిమ బెంగాల్ సంయుక్త బలగాలు బుధవారం చుట్టుముట్టాయి. కిషన్‌జీతో పాటు మరికొంత మంది మావోయిస్టు నాయకులు ఉన్నట్లు అనుమానించారు. కిషన్‌జీ తలదాచుకున్న స్థావరం ఉన్న జంగల్ మహల్ ప్రాంతంలో సంయుక్త బలగాలు గాలింపు చర్యలకు దిగాయి. వెస్ట్ మిడ్నాపూర్ జిల్లాలోని నల్‌బనీ, కుష్బనీ, లాల్‌బనీ, ఝార్‌గ్రామ్ అటవీ ప్రాంతంలో కిషన్‌జీ తలదాచుకున్నట్లు సమాచారం అందడంతో ప్రత్యేక బలగాలు పెద్ద యెత్తున ఆపరేషన్ మొదలు పెట్టాయి.

English summary

According to West Bengal media reports - Maoist leader Kishenji was killed by joint forces.