తెలంగాణపై తీర్మానం చేయండి: సిఎంకు కోదండరాం

By Srinivas

Published: Friday, November 25, 2011, 18:22 [IST]

వరంగల్: అసెంబ్లీలో ఈ శీతాకాల సమావేశాలలోనే తెలంగాణపై తీర్మానం చేయాలని తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరాం శుక్రవారం వరంగల్ జిల్లాలో డిమాండ్ చేశారు. అసెంబ్లీలో తీర్మానంకు సహకరించని పార్టీల నేతలను గ్రామాల్లో తిరగనివ్వవద్దని ప్రజలకు పిలుపునిచ్చారు. అసెంబ్లీ సమావేశాలు ప్రారంభమయ్యే రోజున తెలంగాణలో గ్రామ గ్రామాన ప్రజలు అసెంబ్లీని నిర్వహించాలన్నారు. ఈ నెల 27న జెఏసి స్టీరింగ్ కమిటీ సమావేశమవుతుందని చెప్పారు. పార్లమెంటులో ప్రత్యేక రాష్ట్రం కోసం ఎంపీలు నాలుగు రోజులుగా ఆందోళన చేస్తున్నా ప్రభుత్వం పట్టించుకోవడం లేదని విమర్శించారు.

డిసెంబర్ 1 నుండి ఆందోళనలు ఉధృతం చేస్తామన్నారు. మావోయిస్టు నేత కిషన్ జీ ఎన్‌కౌంటర్ అనైతికమన్నారు. కిషన్ జీని రాజకీయ నేతలంతా ఆదర్శంగా తీసుకోవాలని సూచించారు. ఎన్‌కౌంటర్ పైన సమగ్ర విచారణ జరిపించాలని డిమాండ్ చేశారు. కిషన్ జీ మానవతా విలువలున్న వ్యక్తి అని ఉన్నత లక్ష్యాల కోసం పోరాడిన వ్యక్తి అన్నారు. కాగా కిషన్ జీ మృతదేహాన్ని కుటుంబ సభ్యులకు అప్పగించి హైదరాబాద్ తరలించేందుకు కేంద్ర ప్రభుత్వం చర్యలు తీసుకోవాలని టిఆర్ఎస్ చీఫ్ కె చంద్రశేఖర రావు న్యూఢిల్లీలో సూచించారు.

Published On November 25, 2011