బాబు కేసు మూడు నెలల్లో పూర్తి: సిబిఐ జెడి

By Srinivas

Published: Friday, November 25, 2011, 14:38 [IST]

హైదరాబాద్: తెలుగుదేశం పార్టీ అధినేత నారా చంద్రబాబు నాయుడు ఆస్తులపై ప్రాథమిక విచారణను మూడు నెలల్లో పూర్తి చేసి కోర్టుకు నివేదిక అందజేస్తామని సిబిఐ జాయింట్ డైరెక్టర్ లక్ష్మీ నారాయణ శుక్రవారం అన్నారు. ఆయన హైకోర్టుకు స్వయంగా వెళ్లి వైయస్సార్ కాంగ్రెసు పార్టీ గౌరవ అధ్యక్షురాలు వైయస్ విజయమ్మ వేసిన పిటిషన్ వివరాలు తీసుకున్నారు. అనంతరం ఆయన మీడియాతో మాట్లాడారు. హైకోర్టు సూచనల మేరకు సీల్డ్ కవర్‌లో నివేదిక సమర్పిస్తామని చెప్పారు. అవసరమైతే ప్రతివాదులకు నోటీసులు అందజేసి సమాచారం సేకరిస్తామని చెప్పారు.

కాగా పత్రాలు తీసుకోక ముందు కూడా ఆయన మీడియాతో మాట్లాడారు. వైయస్ విజయమ్మ వేసిన పిటిషన్‌ను పరిశీలించాకే చంద్రబాబుపై కేసు నమోదు చేస్తామని చెప్పారు. ఈ నెల 4వ తేదిన వైయస్ విజయమ్మ బాబు ఆస్తులపై హైకోర్టులో కేసు వేసిన విషయం తెలిసిందే. బాబు ఆస్తులపై ప్రాథమిక విచారణకు హైకోర్టు ఇటీవలే పచ్చజెండా ఊపింది. సిబిఐతో పాటు ఈడి, డిజిపిలు బాబు ఆస్తులపై విచారించనున్నారు. ఇందుకు సంబంధించిన పత్రాలను కోర్టు శుక్రవారం సిద్ధం చేసింది. సిబిఐ అధికారులు వాటిని తీసుకోనున్నారు. మరోవైపు సిబిఐ దర్యాఫ్తు నేపథ్యంలో టిడిపి అధినేత నారా చంద్రబాబు నాయుడు సీనియర్ నేతలతో పార్టీ కార్యాలయంలో సమావేశమయ్యారు.

Published On November 25, 2011