మంత్రికి సిగ్గుండాలి: రచ్చబండ విందుపై దేవినేని ధ్వజం

By Srinivas

Published: Wednesday, November 30, 2011, 15:00 [IST]

హైదరాబాద్: రచ్చబండ విజయవంతమైందని మంత్రి పార్థసారథి విందులు, వినోదాలు చేసుకుంటున్నారని విజయవాడ శాసనసభ్యుడు, జిల్లా టిడిపి అధ్యక్షుడు దేవినేని ఉమామహేశ్వర రావు బుధవారం విరుచుకు పడ్డారు. రచ్చబండ విజయవంతమైందని చెప్పడానికి పార్థసారథికి సిగ్గుండాలన్నారు. అంతేకాకుండా విజయవంతం అంటూ పార్టీ చేసుకోవడం సరికాదని ఇంతకన్నా సిగ్గుపడాల్సిన విషయం మరొకటి లేదన్నారు.

రచ్చబండ అంశంపై తాము అసెంబ్లీలో ప్రభుత్వాన్ని నిలదీస్తామని అన్నారు. తమపై తప్పుడు కేసులు బనాయించి పదవిలో ఉన్న వారిని లేకుండా చేసి కార్యక్రమాన్ని ప్రభుత్వం కొనసాగించిందని విమర్శించారు. ఈ కార్యక్రమం గ్రామాల్లో ప్రజల సమస్యల కోసం ఉద్దేశించినదని కానీ ప్రభుత్వం నియోజకవర్గాల్లో ఏర్పాటు చేసిందని అక్కడ కూడా భారీగా పోలీసు పహారా మధ్య ఏర్పాటు చేయడం హేయమన్నారు.

Published On November 30, 2011