అవిశ్వాసానికి మద్దతు: జెపి, నోటీసు ఇస్తామన్న టిడిపి

హైదరాబాద్: తెలుగుదేశం పార్టీ అసెంబ్లీలో అవిశ్వాస తీర్మానం ప్రవేశ పెడితే తాను ప్రభుత్వానికి వ్యతిరేకంగా ఓటు వేస్తానని లోక్‌సత్తా అధ్యక్షుడు, కూకట్‌పల్లి శాసనసభ్యుడు జయప్రకాశ్ నారాయణ బుధవారం చెప్పారు. గురువారం నుండి అసెంబ్లీ సమావేశాల దృష్ట్యా స్పీకర్ నాదెండ్ల మనోహర్ అధ్యక్షతన బిఏసి సమావేశం జరిగింది. అనంతరం జెపి మీడియాతో మాట్లాడారు. తెలంగాణష అవినీతిపై అసెంబ్లీలో చర్చించాలని తాను ప్రభుత్వాన్ని కోరానని అయితే ఆ అంశాలపై చర్చించేందుకు ప్రభుత్వం నిరాకరించిందన్నారు.

అంతకుముందు తెలుగుదేశం పార్టీ నేత అశోక్ గజపతి రాజు మాట్లాడుతూ రేపు అసెంబ్లీలో తమ పార్టీ అవిశ్వాసానికి నోటీసు ఇవ్వనుందన్నారు. రైతుల సమస్యలే తమ ప్రధాన అజెండా అన్నారు. ధరల పెరుగుదల, విద్యుత్ సమస్య, ఫీజు రీయింబర్స్‌మెంట్, సంక్షేమ హాస్టళ్లు, చేతివృత్తుల సమస్యల తదితర అంశాలు చర్చకు రావాలని ప్రభుత్వాన్ని కోరినట్లు చెప్పారు. సమావేశాలు 15 రోజులు ఉండాలని కోరామన్నారు. ఆది, శనివారాలు సమావేశాలు పెట్టినా తమకు అభ్యంతరం లేదన్నారు. సమావేశాలు, చర్చలపై ప్రభుత్వం కుంటిసాకులు చెప్పి తప్పించుకునే ప్రయత్నాలు చేస్తోందన్నారు.

కాగా బిఏసి సమావేశంలో బిజెపి, టిఆర్ఎస్, సిపిఐ తెలంగాణపై చర్చించాలని అడిగాయి. దానికి ప్రభుత్వం అంగీకరించలేదు. మరోవైపు సిపిఐ రాష్ట్ర కార్యదర్శి నారాయణ కర్నూలులో మాట్లాడుతూ టిడిపి అవిశ్వాసం పెడితే ప్రభుత్వానికి వ్యతిరేకంగా ఓటు వేస్తామని ప్రకటించారు. కాగా సమావేశాలు డిసెంబర్ 1 నుండి 5వ తేది వరకు జరుగుతాయి. శని, ఆదివారాల్లోనూ సమావేశాలు నిర్వహించనున్నారు.

English summary

Loksatta chief Jayaprakash Narayana said today that he will support no-confidential vote if TDP proposed.