అవిశ్వాసం:గందరగోళంలో జగన్ వర్గం, యువనేతలోనూ

By Srinivas

Published: Thursday, December 1, 2011, 10:28 [IST]

హైదరాబాద్: తెలుగుదేశం పార్టీ అవిశ్వాసంపై నోటీసు ఇవ్వడంతో వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి వర్గం శాసనసభ్యులు గందరగోళంలో పడినట్లుగా కనిపిస్తోంది. సభలో టిడిపి అవిశ్వాసంపై డిమాండ్ చేస్తున్న నేపథ్యంలో జగన్ ఎమ్మెల్యేలకు ఏం చేయాలో పాలుపోతున్నట్లుగా కనిపించడం లేదు. ప్రభుత్వానికి అనుకూలంగా ఓటు వేయాలా లేక ప్రతిపక్షానికి అనూకూలంగా ఓటు వేయాలో నిర్ణయించుకోలేక పోతున్నారు. ప్రభుత్వానికి అనుకూలంగా ఓటు వేస్తే తమ చిత్తశుద్ధిని ప్రజలు ప్రశ్నించే పరిస్థితి వస్తుందని అలాకాకుండా అవిశ్వాసానికి మద్దతిచ్చినా ప్రజా సమస్యలను ప్రభుత్వం దృష్టికి తీసుకెళ్లడంలో విఫలమైన టిడిపికి మద్దతిచ్చినట్లవుతుందని వారు భావిస్తున్నారు.

అయితే చంద్రబాబుకు ఎప్పటి నుండో సవాల్ విసురుతున్న జగన్ మాత్రం తమ ఎమ్మెల్యేలను అవిశ్వాసానికి అనుకూలంగా ఓటు వేయాలని ఆదేశిస్తున్నారు. ఒక విధంగా చెప్పాలంటే జగన్ కూడా తర్జన భర్జన పడుతున్నట్లుగా కనిపిస్తోంది. బుధవారం సాయంత్రం ఓదార్పులో ఆయన దమ్ముంటే అవిశ్వాసం పెట్టాలని బాబుకు సవాల్ విసిరారు. ఆ తర్వాత కొద్ది సేపటికే తన వర్గం ఎమ్మెల్యేలను ఇరుకున పెట్టేందుకే బాబు, కిరణ్ కలిసి కుట్ర పన్నుతున్నారని ఆరోపించినట్లు వార్తలు వచ్చాయి. అయినప్పటికీ అవిశ్వాసానికి అనుకూలంగానే ఓటు వేయాలని జగన్ తన ఎమ్మెల్యేలకు ఫోన్ ద్వారా సందేశాలు ఇస్తున్నారు.

ఇదే విషయాన్ని జగన్ ఎమ్మెల్యే పూతలపట్టు రవి కూడా చెప్పారు. సమావేశం వాయిదా పడిన అనంతరం జగన్ వర్గం ఎమ్మెల్యేలు పలువురు స్పీకర్‌తో భేటీ అయ్యారు. అనంతరం ఆయన మాట్లాడుతూ ప్రభుత్వం పడిపోతుందనుకుంటే తాము అవిశ్వాసానికి మద్దతిస్తామని చెప్పారు. జగన్ తన వర్గం ఎమ్మెల్యేలతో ఫోన్లో మంతనాలు జరుపుతున్నారని చెప్పారు. కాగా మరో ఎమ్మెల్యే కాపు రామచంద్రా రెడ్డి సిఎం కిరణ్ కుమార్ రెడ్డితో భేటీ అయ్యారు. అవిశ్వాసం తీర్పానంపై చర్చించేందుకు ఈ రోజు మధ్యాహ్నం జగన్ ఎమ్మెల్యేలు ప్రత్యేకంగా భేటీ కానున్నారు. గైర్హాజరు అయ్యే అవకాశాలనూ పరిశీలించే అవకాశముంది.

Published On December 1, 2011