తెలంగాణపై తీర్మానం పెట్టాలి: ఈటెల రాజేందర్ డిమాండ్

By Srinivas

Published: Friday, December 2, 2011, 10:43 [IST]

హైదరాబాద్: తెలంగాణ అంశంపై తీర్మానం ప్రవేశ పెట్టాలని టిఆర్ఎస్ఎల్పీ ఈటెల రాజేందర్ శుక్రవారం అసెంబ్లీ వాయిదా పడిన అనంతరం డిమాండ్ చేశారు. తెలుగుదేశం పార్టీ పెట్టే అవిశ్వాస తీర్మానంలో చిత్తశుద్ధి లేదని అందుకే తాము తెలంగాణపై తీర్మానం ప్రవేశ పెట్టాలని నోటీసులు అందజేశామన్నారు. మోసానికి మారు పేరు టిడిపి అని ధ్వజమెత్తారు. నాలుగు కోట్ల మంది ప్రజల ఆకాంక్ష అయిన తెలంగాణపై తీర్మానం ప్రవేశ పెట్టలేని ప్రభుత్వానికి కొనసాగే హక్కు లేదన్నారు. నైతికంగా పాలించే హక్కు ఎప్పుడో కోల్పోయిందన్నారు.

యుపి సిఎం మాయావతి పది నిమిషాల్లో ప్రత్యేక రాష్ట్రాల విభజనను ఆమోదించాయని ఇక్కడ అన్ని పార్టీలు కలిసి వస్తే నాలుగు నిమిషాల్లో పూర్తవుతుందని కెటిఆర్ అన్నారు. ఆ తర్వాత అవిశ్వాసంపై నాలుగు రోజులు చర్చించినా తమకు అభ్యంతరం లేదన్నారు. టిడిపి, కాంగ్రెసు అవిశ్వాసం నాటకం ఆడుతున్నాయన్నారు. తెలంగాణపై అవిశ్వాసానికి టిడిపి మద్దతివ్వాలన్నారు. లేదంటే వాళ్ల బండారం తెలంగాణ ప్రజలు గుర్తిస్తారన్నారు. కాగా అంతకుముందు టిఆర్ఎస్ ఎమ్మెల్యేలు స్పీకర్ నాదెండ్ల మనోహర్‌కు తెలంగాణపై అవిశ్వాసం నోటీసు ఇచ్చారు. కాంగ్రెసు తెలంగాణకు మోసం చేసిందని అందులో పేర్కొన్నారు.

Published On December 2, 2011