ఓఎంఆర్‌ షీట్ బదులు: బిసి వార్డెన్ పరీక్షల్లో గందరగోళం

By Srinivas

Published: Sunday, December 18, 2011, 15:59 [IST]

నల్గొండ/మహబూబ్ నగర్: బిసి వార్డెన్ పోస్టుల భర్తీకి ఆదివారం జరిగిన పరీక్షలు నల్గొండ, మహబూబ్ నగర్ జిల్లాలో ఉద్రిక్తతకు దారి తీశాయి. దీంతో మహబూబ్ నగర్ జిల్లాలోని 29 కేంద్రాల్లో పరీక్షలు వాయిదా వేశారు. మహబూబ్ నగర్ జిల్లాలో ఓఎంఆర్ షీటుకు బదులు తెల్లకాగితం ఇవ్వడంతో అభ్యర్థులు ఆందోళనకు దిగారు. ప్రింటెడ్ ఓఎంఆర్ షీటు ఇవ్వాలని అధికారులను నిలదీయడంతో గందరగోళం చెలరేగింది. అధికారుల వైఖరికి నిరసనగా అభ్యర్థులు కలెక్టరేట్‌ను ముట్టడించారు. ఆందోళకారులను చెదరగొట్టేందుకు పోలీసులు లాఠీఛార్జ్ చేశారు. ఈ ఘటనలో పలువురికి గాయాలయ్యాయి. విద్యార్థులు ప్రతిగా పోలీసులపై రాళ్లు రువ్వారు. జీపును ధ్వంసం చేశారు. విద్యార్థుల ఆందోళన కారణంగా పరీక్షలను వాయిదా వేస్తున్నట్లు ప్రకటించారు.

మరోవైపు నల్గొండ జిల్లాలో బిసి వార్డెన్ పరీక్షా పత్రం లీకైందనే పుకార్లు రావడంతో సెయింట్ ఆల్ఫోన్సెస్ పరీక్షా కేంద్రం వద్ద విద్యార్థులు ఆందోళనకు దిగారు. పరీక్షలను వాయిదా వేయాలని డిమాండ్ చేశారు. ఈ కేంద్రం అమ్ముడు పోయిందంటూ ఆరోపించారు. జిల్లా అధికారులు, పోలీసులు విద్యార్థులకు నచ్చజెప్పే ప్రయత్నాలు చేశారు. అయినా అభ్యర్థులు పరీక్ష రాసేందుకు నిరాకరించారు. ఇరువర్గాల మధ్య వాగ్వాదం చోటు చేసుకుంది. మరోసారి అధికారులు పరీక్షా పత్రం లీక్ కాలేదని నచ్చజెప్పడంతో పరీక్షలు రాసేందుకు విద్యార్థులు ఒప్పుకున్నారు.

Published On December 18, 2011