కిడ్నాప్‌కు గురైన కాంట్రాక్టర్ హత్య,శ్రీకాకుళంలో బాలుడు

By Srinivas

Published: Monday, December 19, 2011, 10:47 [IST]

కడప/శ్రీకాకుళం: శ్రీ పొట్టి శ్రీరాములు నెల్లూరు జిల్లాలో కిడ్నాప్‌కు గురైన రియల్ ఎస్టేట్ వ్యాపారి కాంట్రాక్టర్ రాఘవ రెడ్డి సోమవారం ఉదయం కడప జిల్లా బద్వేల్ చెరువులు విగతజీవుడుగా కనిపించాడు. ఎస్పీఎస్ నెల్లూరు జిల్లా మాగుంట లే అవుట్‌లో నివాసముంటున్న రాఘవ రెడ్డి తవ స్వంత గ్రామమైన చేజర్ల మండలం మడపల్లి నుండి ఈ నెల 13న కిడ్నాప్‌కు గురయ్యారు. 15వ తేదిన రాఘవ రెడ్డి తనయుడు పోలీసులకు ఫిర్యాదు చేశాడు. పోలీసులు విచారణ చేస్తుండగానే విగత జీవుడుగా కనిపించాడు. అయితే వ్యాపార లావాదేవీల్లో వచ్చిన విభేదాల కారణంగానే హత్యకు గురైనట్లు అనుమానాలు వ్యక్తమవుతున్నాయి. హత్య కేసులో కొందరిని పోలీసులు అదుపులోకి తీసుకొని విచారిస్తున్నారు. నిందితుల నుండి ఒక వాహనాన్ని స్వాధీనం చేసుకున్నారు.

కాగా శ్రీకాకుళం జిల్లాలోని పాతపట్నంలో ఆదివారం మధ్యాహ్నం కిడ్నాప్‌కు గురైన కార్తీక్ అనే మూడేళ్ల బాలుడు సోమవారం ఉదయం తాను చదువుతున్న పాఠశాలలో శవమై కనిపించాడు. కుటుంబ కలహాల కారణంగానే దుండగులు ఈ హత్యకు పాల్పడినట్లు అనుమానాలు వ్యక్తమవుతున్నాయి. పోలీసులు కేసు నమోదు చేసుకొని దర్యాఫ్తు చేస్తున్నారు.

Published On December 19, 2011