చిరుకు కిరణ్ అడ్డుపడుతున్నారా?, చెవిరెడ్డి వ్యాఖ్య

By Pratap

Published: Thursday, December 22, 2011, 16:37 [IST]

హైదరాబాద్: మెగాస్టార్ చిరంజీవి విషయంలో వైయస్ జగన్ నాయకత్వంలోని వైయస్సార్ కాంగ్రెసు పార్టీ నాయకుడు చెవిరెడ్డి భాస్కర రెడ్డి సంచలన ప్రకటన చేశారు. చిరంజీవికి కేంద్ర మంత్రి పదవి రాకుండా ముఖ్యమంత్రి కిరణ్ కుమార్ రెడ్డి అడ్డుపడుతున్నారని ఆయన గురువారం మీడియా ప్రతినిధుల సమావేశంలో అన్నారు. చిరంజీవి కేంద్ర మంత్రి పదవి చేపడితే తిరుపతి శాసనసభా స్థానానికి ఉప ఎన్నిక వస్తుందని, అప్పుడు కాంగ్రెసుకు డిపాజిట్ కూడా రాదని, దాంతో కిరణ్ కుమార్ రెడ్డి భయపడుతున్నారని ఆయన అన్నారు.

చిరంజీవికి తిరుపతి నగరాభివృద్ధి సంస్థ (తుడా) చైర్మన్ పదవి ఇవ్వాలనే ప్రతిపాదన సిగ్గుచేటు అని ఆయన అన్నారు. శాసనసభ్యుడు పూతలపట్టు రవి అవిశ్వాస తీర్మానం సమయంలో శాసనసభకు గైర్హాజరు కావడం వెనక పెద్ద కుట్ర ఉందని ఆయన విమర్శించారు. పూతలపట్టు రవికి ముఖ్యమంత్రి కిరణ్ కుమార్ రెడ్డి మూడు కోట్ల రూపాయలు ఇచ్చి, అడ్డుకున్నారని ఆయన ఆరోపించారు. ప్రభుత్వంపై తెలుగుదేశం పార్టీ ప్రతిపాదించిన అవిశ్వాస తీర్మానంపై ఓటింగు సందర్భంగా పూతలపట్టు రవి సభ నుంచి బయటకు వెళ్లిపోయిన విషయం తెలిసిందే.

Published On December 22, 2011