10న తెలంగాణలో అడుగు పెట్టనున్న వైయస్ జగన్

By Pratap

Published: Tuesday, January 3, 2012, 15:15 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్ తెలంగాణ పర్యటన ఖరారైంది. వైయస్సార్ కాంగ్రెసు పార్టీ తెలంగాణ నాయకులు మంగళవారం సమావేశమైన ఆయన పర్యటనను ఖరారు చేశారు. నిజామాబాద్ జిల్లాలోని ఆర్మూర్‌లో వైయస్ జగన్ 48 గంటల పాటు రైతు దీక్ష చేస్తారని పార్టీ అధికార ప్రతినిధి బాజిరెడ్డి గోవర్ధన్ సమావేశానంతరం మీడియా ప్రతినిధులతో చెప్పారు. ఈ నెల 10, 11, 12 తేదీల్లో వైయస్ జగన్ దీక్ష చేస్తారని ఆయన చెప్పారు. జగన్ దీక్ష 10వ తేదీ ఉదయం 11 గంటలకు ప్రారంభమై 12వ తేదీ మధ్యాహ్నం 3 గంటలకు ముగుస్తుందని ఆయన చెప్పారు. ఈ దీక్షలో తెలంగాణ రైతులు పెద్ద యెత్తున పాల్గొంటారని ఆయన చెప్పారు.

తెలంగాణలో రైతు బతుకులు అధ్వాన్నంగా మారాయని ఆయన అన్నారు. వైయస్ రాజశేఖర రెడ్డి హయాంలో మహారాష్ట్రలో పత్తి ధరలు పడిపోతే అక్కడి రైతులు ఆదిలాబాద్‌కు వచ్చి అమ్ముకున్నారని ఆయన చెప్పారు. అప్పుడు ఇక్కడి రైతులకు గిట్టుబాటు ధర లభించేదని ఆయన అన్నారు. ప్రస్తుతం రైతులకు గిట్టుబాటు ధర లభించడం లేదని ఆయన అన్నారు. రైతులకు పెట్టుబడులు కూడా రాని పరిస్థితి ఏర్పడిందని ఆయన అన్నారు. తెలుగుదేశ పార్టీ అధ్యక్షుడు నారా చంద్రబాబు నాయుడితో తమకు పోలికేమిటని, చంద్రబాబు రైతులను పీల్చి పిప్పి చేశారని ఆయన ఒక ప్రశ్నకు సమాధానంగా అన్నారు.

Published On January 3, 2012