బాబు ఇంటింటి పెగ్గు ఆలోచన తప్పు: వైయస్ జగన్

విజయవాడ: దినమంతా కష్టపడిన వ్యక్తికి ఒక పెగ్గు సారా ఉండాలని తెలుగుదేశం పార్టీ అధ్యక్షుడు నారా చంద్రబాబు నాయుడు చేసిన వ్యాఖ్యపై వైయస్సార్ కాంగ్రెసు పార్టీ అధ్యక్షుడు వైయస్ జగన్ మండిపడ్డారు. ఇంటింటికి పెగ్గు అనే చంద్రబాబు ఆలోచన తప్పు అని ఆయన అన్నారు. కృష్ణా జిల్లాలోని కల్తీ మద్యం బాధితులను ఆయన మంగళవారంనాడు పరామర్శించారు. ఆబ్కారీ అధికారులకు ప్రభుత్వం టార్గెట్లు పెడుతోందని ఆయన అన్నారు. కల్తీ సారా తయారు చేసినవారిని అరెస్టు చేయలేని దయనీయమైన స్థితిలో ప్రభుత్వం ఉందని ఆయన అన్నారు. తెలిసే యువత, మహిళల జీవితాలను నాశనం చేస్తున్నారని ఆయన మండిపడ్డారు. ప్రభుత్వ, ప్రతిపక్షాల తీరుపై ఆయన విరుచుకుపడ్డారు.

తమ పార్టీ అధికారంలోకి వస్తే సువర్ణ పాలన అందిస్తామని ఆయన చెప్పారు. అది ఎంతో దూరంలో లేదని అన్నారు. గ్రామాల్లో బెల్టు షాపులు, మద్యం దుకాణాలు లేకుండా చూస్తామని ఆయన హామీ ఇచ్చారు. ప్రతి వేయి మంది ఉన్న గ్రామానికి 10 మంది మహిళా పోలీసులతో స్టేషన్‌ను ఏర్పాటు చేస్తామని ఆయన చెప్పారు. కల్తీ సారా బాధితులను పరామర్శించడానికి ముఖ్యమంత్రి, మంత్రులు రాకపోవపడం దారుణమని ఆయన అన్నారు. కల్తీ సారా బాధితులకు 50 వేల రూపాయల చొప్పున నష్టపరిహారం ఇస్తామని తాము ప్రకటించిన తర్వాతనే ప్రభుత్వం రెండేసి లక్షల రూపాయల నష్టపరిహారానం ప్రకటించిందని ఆయన అన్నారు. గ్రామాల్లో సంపూర్ణ మద్యనిషేధం విధిస్తామని ఆయన చెప్పారు.

English summary

YSR Congress president YS Jagan countered TDP president N Chandrababu Naidu.