ప్రభుత్వం ఖాతరు చేయట్లేదు: జెఏసి చైర్మన్ కోదండరాం

By Srinivas

Published: Friday, January 13, 2012, 17:06 [IST]

హైదరాబాద్: తెలంగాణ ఐక్య కార్యాచరణ సమితితో చేసుకున్న ఒప్పందాలను ప్రభుత్వం ఏమాత్రం ఖాతరు చేయడం లేదని తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరామ్ శుక్రవారం ఆరోపించారు. హైదరాబాద్‌లోని భారతీయ జనతా పార్టీ కార్యాలయంలో జెఏసి స్టీరింగ్ కమిటీ సమావేశమైంది. అనంతరం కోదండరామ్ మీడియాతో మాట్లాడారు. సమైక్యాంధ్రలో తెలంగాణ ప్రజలు ద్వితీయ శ్రేణులే అన్నారు. తెలంగాణ సాధనే జెఏసి అజెండా అన్నారు. భవిష్యత్ కార్యాచరణపై స్టీరింగ్ కమిటీలో చర్చించామన్నారు. తెలుగుదేశం పార్టీ అధినేత నారా చంద్రబాబు నాయుడు, వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి యాత్రలు తెలంగాణ ఆత్మగౌరవంపై దాడి అన్నారు. ఈ నెల 20వ తేదిన విస్తృతస్థాయి సమావేశం ఏర్పాటు చేస్తామని చెప్పారు. తెలంగాణలోని పది జిల్లాల్లో బిజెపి చేస్తున్న యాత్రకు జెఏసి పూర్తి మద్దతు ఇస్తుందన్నారు.

తెలంగాణ ఉద్యోగులపై ప్రభుత్వం వేధింపులు ఆపాలంటూ త్వరలో ముఖ్యమంత్రి కిరణ్ కుమార్ రెడ్డికి వినతి పత్రం ఇస్తామని చెప్పారు. వేధింపులపై ప్రభుత్వం స్పందించకుంటే ప్రభుత్వ కార్యాలయాల ఎదుట ధర్నాలు చేస్తామని ప్రకటించారు. ముఖ్యమంత్రి, డిజిపి సహకారంతోనే చంద్రబాబు, జగన్‌లు తెలంగాణలో పర్యటించారని స్టీరింగ్ కమిటీ నేతలు ఆరోపించారు. ఈ విషయంపై తీవ్రస్థాయి ప్రతిఘటన చర్యలు తీసుకోవాలన్నారు.

Published On January 13, 2012